د ننګرهار ولایت بټي کوټ ولسوالي،له ښار سره په څو کلیومترۍ کې موقعیت لري، د یادې ولسوالۍ خلک وایي، توکي له ګاونډي هېواد پاکستان په کلدارو رانیسي او اړ دي، دلته یې په کلدارو ورکړي، که نه دومره تاوان کوي،چې له وسه یې پورته دی.
د بټي کوټ ولسوالۍ کې یو تن رخت پلورونکی وايي:«موږ دلته ځکه پر کلدارو راکړه ورکړه کوو،چې په بازار کې له کلدارې استفاده کېږي. همدا لامل دی، چې دلته کلداره ډېره کارول کېږي. زه خپلې هټۍ رخت هم له ګاونډي هېواد پاکستانه پر کلدارو راوړم او خپلو پېرېدونکو یې پر کلدارو پلورم. که چېرې پر افغانیو راکړه ورکړه وشي، دولت او هم موږ هټیوالو ته ګټه ده.»
یو شمېر نور بیا وايي، ولسوالۍ سرحدي دي او تر ډېره په کې دوی په کلدارو راکړه ورکړه کوي.
صرافان وايي، دلته د کلدارو چلښت ځکه عام شوی،چې تر ډېره خلک له ګاونډي هېواد سره راشه درشه لري او توکي هلته په کلدارو رانیسي.
یو تن صراف وايي:« دلته پر پاکستانۍ کلدارو راکړه ورکړه تر ډېره ځکه کېږي،چې دا سرحدي ولایت دی.له پاکستانه سره ګډه کرښه لري. سوداګر توکي پر کلدارو راوړي او پر کلدارو یې پلوري. »
اسد چې په بټي کوټ کې د درملو عمده پلورنځی لري وایي، تر ډېره درمل له پېښوره پر کلدارو راوړي او دلته یې ځکه په افغانیو نه شي ورکولای،چې بازار د کلدارو دی او دوی هم اړ دي،چې په کلدارو یې وپلوري
یو تن درمل پلورونکی وايي:« دلته پر کلدارو راکړه ورکړه، ځکه زیاته ده،چې خلک توکي پر کلدارو اخلي او بېرته یې پر کلدارو پلوري. همدا لامل دی،چې دلته کلداره ډېره کارول کېږي.»
له هغې وروسته،چې پاکستان وویل له افغانستان سره به سوداګري په کلدارو کوي،خلکو سره ګڼې اندېښنې پېدا شوي،چې دا به د افغانیو ارزښت کم کړي او د اقتصاد په برخه کې به هېواد ته لوی تاوان واړوي.
له دې وړاندې د جمهوریت پر مهال د ننګرهار والي شاه محمود میاخېل د کلدارو مخنیوي لپاره پراخې هڅې وکړې،چې بریالی هم شو.
