انتوني بلینکن په دغو خبرو کې د سیمې هیوادونو او په ځانګړې توګه د پاکستان د رول په اړه هم خبرې وکړې.
بلینکن وايي، له پاکستان سره به پر خپلو اړیکو یو ځل بیا فکر وکړي،ځکه دغه هېواد په تېرو شلو کلونو د طالبانو په جګړې کې مهم رول لوبولی دی.
بلینکن وايي:«دا یوازې موږ نه یو بلکې نړیواله ټولنه هم دا هرڅه له نږدې ګوري، هغه څه چې موږ به یې په راتلونکو ورځو او راتلونکو اونیو کې په پام کې ونیسو له پاکستان سره زموږ د اړیکو ارزونه ده. هغوی په تیرو ۲۰ کلونو کې کوم رول لوبولی او راتلونکي کې به څه ډول رول ولوبوي. دا به د هغوی پر اړیکو قضاوت وکړي.»
بلینکن پر پاکستان د طالبانو د همکارۍ نیوکې داسې مهال کوي،چې کلونه وړاندې د وخت د امریکا بهرنیو چارو وزیرې، هیلري کلنټن له پاکستان سره په ګډه د طالبانو د تقویه کولو او ملاتړ اعتراف کړی و.
د امریکا د بهرنیو چارو پخوانۍ وزیره هیلري کلنټن وايي:«دا له یاده مه باسئ، هغه خلک چې موږ ورسره اوس جګړه کوو، کلونه وړاندې مو د هغوی ملاتړ کړی دی. ځکه هلته شوروي وو او موږ له د پاکستان له پوځ او آی اس آی سره په ګډه دا کار کړی دی.»
بلینکن په خپلو تازه خبرو کې له افغانستانه د نورو ۶۰ زره کسانو د اېستلو اعلان هم وکړ او په خبره یې دغه بهیر به ژر پيل کړي.
بلینکن وايي:«موږ په پام کې لرو،چې د روانې میاشتې تر پایه به شااوخوا ۶۰ زره کسان راوباسو. په دوی کې ډېری هغه کسان دي،چې د اس.آی.وي د پروسې په برخه کې وو. هغه کسان،چې اس .آی.وي ویزو پر شرایطو برابر دي. له دې پرته نور کسان هم له اوږده امنیتي ازمیښت وروسته امریکا ته را استول کیږي.»
بلینکن یو ځل بیا د طالبانو حکومت په رسمیت پیژندل،د هغوی راتلونکو اعمالو پورې وتړل او زیاته یې کړه.چې د هغوی دریځونه او کړنې به وګوري او بیا به پریکړه وکړي.
