اقتصاد پوه عبدالواسیع حیدري وايي: «د امریکا له لوري د پیسو کنګل کېدل، له افغان ولس سره ستر ظلم او جفا ده. له موږ سره امریکا جفا کوي. هغوي ۹ میلیارده ډالر کنګل کړي. امریکا د دې پیسو د ازاد کیدو تر څنګ، باید له افغان حکومت سره نورې ډېرې مالیي مرستې وکړي.»
خو یو شمیر نو بیا وایي، د نړیوالو اصولو له مخې کومو هېوادونو کې چې کودتا ترسره کېږي او یا هم د نظامونو بدلون رامنځته کېږي، د نړیوالو هېوادونو له لوري د یاد هېواد پانګه کنګل اعلانېږي.
اوس غوښتنې دا دي چې طالبان دې هڅه وکړي، کنګل شوې پیسې وژغوري.
د چارو څارونکی بهار مل بهار وايي: «په افغانستان کې هم داسې وضعیت رامنځته شوی دی. د افغانستان پیسې کنګل شوي او چارواکو او طالبانو ته پکار ده، تر څو نړیوالو ته، ملګرو ملتونو ته قناعت ورکړي او د باور زمینه سازي وکړي، تر څو سرمایه له کنګل حالت وباسي. افغانستان تر ډېره وارد کوونکی هېواد دی، چې تجارت یي په نغدي پیسو ولاړ دی او دا حالت باید کنټرول شي.»
پرون د هېواد ملي سوداګرو هم اعتراضیه غونډه درلوده چې د پیسو له کنګل کیدو یې شکایت وکړ او د سوداګریزو اړیکو او اقتصاد خرابیدو خبر یې ورکړ.
دوی دا خبرې داسې مهال کوي چې د طالبانو واکمنۍ سره د امریکا له لوري د افغانستان نږدې لس میلیارده ډالرو کنګل اعلانولو، سره افغانستان له اقتصادي ناورین سره مخ کړی او دامهال د نړۍ او سیمې ټولو بانکونو ته له افغانستانه د پیسو د لېږد را لېږد بهیر درېدلی دی.