د اسلامي امارت له لوري د کابل نړیوال هوايي ډګر له پاره هغه ښځينه کارکوونکې خپلو دندو ته غوښتل شوي،چې مخکې يې په محلي ترمينل کې د داخلي الوتنو پر وخت پلټنه تر سره کوله.
د هوايي ډګر ښځېنه کارکوونکې بیا وايي، خوشاله دي،چې بيا خپلو دندو ته راوغوښتل شوي، خو په خبره یې ډاډ یې ترې نه دی ترلاسه کړی،چې تنخوا ورکول کېږي او که نه؟
د کابل هوايي ډګر یوه کارکوونکې انيسه وايي:« کله چې موږ له خپلو دندو څخه رخصت شولو، زموږ ټول کارمندان ډېر ناراحته ول او ښه احساس مو نه کاوه. کله چې موږ بېرته خپلو دندو ته وغوښتل شو، نو اوس ډېر خوشاله يو او کارونه مو په ښه جوش د پخوا په شکل روان دي. نورې ستونزې نشته، خو یوازې د معاش ستونزه مو ده،چې بايد زر راکړل شي.»
محلي ترمينل کې د مسافرو د پلټنې برخې مسوول وايي، هېڅ ډول تخنيکي ستونزه نه شته، هوايي ډګر هرډول الوتنو ته چمتو شوی،خو په خبره یې، هغه کمپنۍ چې د دوی معاشونه یې ورکول اوس له هېواده بهر تللې او د خپلې تنخواه په اړه اندېښنه لري.
هوايي ډګر کې د محلي ترمينل کارکوونکی سيف الرحمن وايي:« زموږ يوازنۍ د کارکوونکو هغه کمپنۍ ده،چې تللې، اوس د دوی د معاشونو مشکل دي، چې دا معاشونه رفع شي، نور موږ هېڅ مشکل نه لرو، چک برخه کې د ايکسرۍ ماشينونه او د فلزاتو د کشف دروازې ټولې فعاله دي. کارکوونکي ښځې او نارینه دواړه راځي.»
کابل هوايي ډګر څخه همدا نن کندهار ته الوتنه ترسره شوه او مسافر خوښ وو،چې کورنۍ الوتنې په عادي ډول پيل او ترمينل ته ښځينه کارکوونکې راغوښتل شوي دي.
یو تن مسافر وايي:« يو شی،چې ښه خبره ده او تر سترګو کېږي، تقريبا هغه ښځينه کارکوونکي تر سترګو کيږی، نو ښځينه کارکونکي،چې تر سترګو کېږی،ځکه ايرفوټ کې ښځينه او نارينه دواړه تر سترګو کېږي او تګ راتګ کوي، نو د همدې له پاره پکار ده،چې د خدماتو له پاره هم ښځينه وي او هم نارينه وي.»
ترښځينه کارمندانو يوه ورځ وړاندې هوايي ډګر ته هغه سرحدي ځواکونه هم غوښتل شوي ول،چې پخوا يې په هوايي ډګر کې دنده تر سره کوله.