ډاکټره فهیمه رحمتي، چې له تېرو څو کلونو راهیسې د هیله خیریه بنسټ له لارې د کندهار له سلګونو کورنیو سره مرستې کړي دي وايي، پرون شپه یې کور ته ورغلي او دوی یې وهلي ډبولي دي.
رحمتي وايي، طالبانو د دې دوه ورونه، اوښی او د خور لېور له ځان سره بېولي دي.
رحمتي زیاتوي:«زما ورونه لا تر اوسه نادرکه دي. هیله لرم امارات مو غږ واوري. زما دوه ورونه زما اوښی، د خور لیور ورک دي، چېرې او له چا سره دي؟»
هغې له پېښې وروسته له خپل فېسبوک څخه هم په ژوندۍ بڼه را څرګنده شوه، په چیغو چیغو یې ژړل او ویې ویل، طالبانو د دې د ورور د بېولو هڅه کوله خو دې او د کورنۍ نورو غړو یې مخنیوی کړی دی.
رحمتي وايي طالبانو د دې په ګډون د دې د کورنۍ ښځینه غړي او ماشومان وهلي او له دوی یې ټلیفونونه اخېستي دي.
رحمتي زیاتوي:« ولې وحشت خپروئ؟ ایا حکومت داسې کېږي؟ ولې مو له هېواده تېښتې ته اړوئ. ایا د اسلام دین د داسې کړنو اجازه ورکوي؟ ما ته د درېیو هېوادونو له خوا د کډوالۍ بلنه راغله،خو ومې نه منله، ما ویل چې هېواد ما ته اړتیا لري.»
ډاکتره فیمه زیاتوي، طالبان په داسې حال کې په نیمه شپه د دې کور ته ور اوړي،چې نه د دولت کارکوونکې ده او نه یې په کور کې وسله لرله، بلکې د یوه خیریه بنسټ د مسوولې په توګه یې تل د طالبانو د کورنیو په ګډون د بې وزلو وګړو لاسنیوی کړی دی.
اخوا د کندهار د والي مطبوعاتي استازی محمود عزام وایي،د کندهار والي محمد یوسف وفا او نور امنیتي مسوولینو د یادې پېښې په اړه څېړنې پیل کړي او تر بشپړېدو وروسته به په دې اړه ټول مالومات له رسنیو سره شریک شي.
عزام زیاته کړه:«د فهیمې رحتمي پر کور چاپه وهل خپلسري وه، دا د اسلامي امارت له تګلارې سره په ټکر کې ده، عاملین به یې په سزا رسول کېږي.»
ډاکټره فهیمه رحمتي، چې د یوه خیریه بنسټ مشره ده،د کندهار د وروستیو جګړو پر مهال یې نه یوازې،سلګونو بې ځایه شویو کورنیو ته مرستې راټولې کړې،بلکې د سلګونو ناروغانو وړیا درملنه یې هم وکړه.