د ننګرهار ولایت په مرکز جلال اباد ښار کې د جمعې پر ورځ د «۱۴۰۰ کال د وږي پر ۲۰ مه» له امریکايي اشغاله د خلاصون، ازادۍ ګټلو او سولې تر عنوان لاندې د فوټبال سیالۍ پیل شوې.
یادې سیالۍ،چې مالي لګښت یې د ننګرهار والي شیخ ندا محمد ندیم پر غاړه اخیسی، په شېرزي لوبغالي کې تر سره کېږي،چې څو ورځې به دوام وکړي.
د فوټبال فیدراسیون غړی ایمل ساپی وایي، فوټبال ډېر پرمختګ کړی او د اسلامي امارت په راتلو سره به یاده لړۍ لا نوره هم وده وکړي.
ساپي فوټبال سیالیو ته د زیاتې پاملرنې غوښتنه وکړه، تر څو لوبغاړي یې ملي لوبډلې ته لار ومومي.
ساپی زیاتوي:«زموږ ورزش فوټ بال ډېر پرمختګ کړی او اوس هم په پرمختګ کې روان دی. د امارت په دولت کې به زموږ لوبغاړي ډېر وځلېږي. زموږ له محترم والي صیب نه دا غوښتنه ده،چې د ننګرهار لوبغالواو د فوټبال فیدراسیون ته دې نظم او دیسپلین منځته راوړي. له موږ سره دې مالي مرسته وکړي،چې وکولای شو ملي ټیم ته لاره پېدا کړو.»
ننګرهار کې د فوټبال روزوونکي خوښ دي،چې په ډاډمنه فضاء کې سیالۍ ترسره کوي او ډاډ یې وښود، چې د ورزش له لارې به له بدو لارو نه د ځوانانو د راګرځولو لپاره هڅې وکړي.
د فوټبال یو تن روزونکي وايي:« خوشحاله یو، د امیت لخوا او د فوټبالرانو له خوا اوس ازادانه هر څوک کولای شي،چې راشي او سیالۍ وکړي. مشکل نه لرو،لکه څنګه چې مو پخوا کوښښ کاوه، اوس به هڅه وکړو،چې له هغې لا پر لوړه کچه لوبو ته دوام ورکړو.»
د فوټبال یو تن روزونکی وايي:« بالکل چیرته چې امنیت وي،هلته هر کار کېږي، امنیت خوشبختان سل سلنه شتون لري، په ټول افغانستان کې نه ډزې شته،نه غلا شته،نه چور او چپاول شته. که زموږ فوټبال ته پاملرنه وشي،موږ میادانونه لرو،خو مشکل مو دا وو،چې وړاندې دلته د فوټبال په فیدراسیون کې دکتاتوران ناست ول.»
لوبغاړي له ځايي مسوولینو خوښ دي، چې له راتګ سره سم یې دوی سره ناستې وکړې او د سیالیو ښه زمینه یې ورته برابره کړه.
د فوټبال یوتن لوبغاړی وايي:« داچې نظام بدل شوی دی، دغه سیالۍ د اسلامي امارت له لورې پر لاره اچول شوي دي. موږ به خپل ورزش ته ادامه ورکړو،چې په هر صورت وي که دا نظام وي او که بل وي که زموږ ورزش سره څوک کار ونه لري، موږ به خپل ورزش ته ادامه ورکړو.»
د فوټبال یو تن لوبغاړی وايي:« د امارت دغه یو کار یې ډېر ښه فکر وه،چې څنګه ننګرهار ته راغلل له لوبغاړو سره یې ناستې وکړې او دا ټورنمینټ یې جوړ کړو چې د ننګرهرا ورزش او فوټبال بېرته پرمختګ وکړي.»
له دې وړاندې هم په ننګرهار کې د فوټبال زیاتې سیالۍ تر سره شوي،خو لوبغاړو او سیلانیانو به د امنیتي پيښو له وېرې زړه نه ښه کاوه،چې سیالیو کې برخه واخلي او یا یې ننداره وکړي.