یوه کورنۍ ادعا کوي، چې پنځلس کلنه لور یې د جمعې په ورځ مزار ښار کې تښتول شوې ده.
د یادې کورنۍ مشر او د نجلۍ پلار محمد کاظم امیني شمشاد ته وویل، چې پنځلس کلنه لور یې د مزار ښار له ظهیرالدین کارتې څخه اختطاف شوې ده.
د هغه په خبره، د شاوخوا ۲۴ ساعتونو په تېرېدو سره یې لاهم د لور کوم څرک نه دی موندلی.
خو بلخ کې د اطلاعاتو او کلتور سرپرست ذبیح الله نوراني شمشاد ته وویل، چې د یادې قضیې پلټنې پیل شوي دي.
نوموړي د نجلۍ اختطاف کېدل نه تاییدوي، خو وایي چې له پلټنو وروسته به په دې تړاو کره معلومات خپاره کړي.
د هغه په وینا، ښایي یاده نجلۍ په خپله خوښه تښتېدلې وي.