ځایي چارواکي وايي، دغه يونیفورم یې هغو طالب سرتېرو ته ورکړی دی، چې ښار کې د امنیت او نظم په موخه پر دندو ګومارل شوي.
دوی وايي، تر اوسه پورې یې دوه زره طالب سرتېرو ته دغه رسمي یونیفورم ورکړی او ډېر ژر به دغه لړۍ د کندهار ټولو ولسوالیو ته هم وغځوي.
د چارواکو په خبره،له دې وروسته به له ټاکل شوي یونیفورم پرته هیڅ طالب سرتېری ښار کې د وسلې ګرځولو اجازه ونه لري.
د کندهار امنیت آمر مولوي عبدالرشید منیب وايي:« کله چې دوی پر ګزمه وي،نو ولسونه باید دوی وپېژني، یا که خلک ستونزه ولري، له دوی سره یې په اسانۍ سره شریکه کړي. نو دا زموږ لومړنۍ اړتیا وه.»
بل پلو د کندهار ښار اوسېدونکو د مسوولینو دغه ګام ستایلی او هېله لري،چې په دې سره به د ښار نظم ډاډمن شي.
د کندهار ښار یو تن اوسېدونکی وایي:« زه ډېر د خوشالۍ احساس کوم،چې ټولو ته یو قسم لباس جوړ شو. موږ ته هر یو جلا جلا رامعلومېږي،چې دا یو افغانی دی. الله مو ساتونکی دی، خو وروسته زموږ ساتونکي دوی دي.»
هغه طالب سرتېري،چې تازه ورته ځانګړی یونیفورم ورکړل شوی، ژمنه کوي،چې د خلکو خدمت او ښاري نظم لپاره به کار کوي.
یو تن طالب سرتېری وايي:« موږ به له خلکو سره ښه چلن کوو. ټول افغانان خوښ دي. خلک نور له جګړو ستړي دي.»
دغه ګام ورورسته له هغه پورته شوی،چې څو ورځې وړاندې کندهار ښار کې ځینو کسانو د طالب په نوم د خلکو کورونو ته ورغلي، وهلي ډبولي یې دي او د خلکو موټرونه او پیسې یې ترې وړي دي.