د افغانستان اسلامي امارت ویاند ذبیح الله مجاهد نن دوشبنه د « ۱۴۰۰ کال د وږي پر ۱۵ مه» کابل کې د یوه خبري کنفرانس پر مهال وویل، په نږدې څو ورځو کې به نوی حکومت اعلان شي او د افغانستان ټول قشرونه به په کې ځان وګوري، خو دغه حکومت به د سرپرست په توګه خپل کارونه پرمخ بیايي.
مجاهد زیاته کړه:«اوس یوازې پر تخنیکي برخو کار روان دی، چې حکومت اعلان شي او موږ یې هم د اعلان لپاره تلوار لرو، خو هڅې روانې دي چې اساسي کار وشي او په لنډو شپو کې به د نوي حکومت د اعلان شاهدان اووسو. وړاندوینه دا ده چې نوی حکومت به د سرپرستۍ په بڼه خپل کارونه پرمخ یوسي او له دې هدف دا دی چې په راتلونکي کې د اصلاحاتو او تغیر لپاره په کې په اسانه بدلون راوستل شي.»
د راتلونکي حکومت په تړاو بېلابېل تحلیلونه کېږي، ډېری په دې باور دي چې د طالبانو پر وړاندې دوه انتخابه دي، لومړی یې خپله داعیه ده، هغه څه چې دوی افغانستان کې د اسلامي نظام په جوړولو ټینګار کوي او بل داسې حکومت چې نړۍ یې د رسمیت پیژندلو لپاره وړاندیز کوي.