د سیاسي چارو شنونکی شعور نیازی وايي:« ګاونډیان نه یوازې دا چې دلته خپلو منافعو ته وګوري، ګانډيتوب ته هم باید وګوري. زموږ حق ته هم چې پر دوی یې لرو، وګوري. دوی هم پر موږ حقونه لري. د دې په رعایت سره باید دوی بشري مرستو ته دوام ورکړي، پرته له دې چې سیاسي، یا حکومتي اړخ ته وګوري. زموږ ګانډیان ډېری مسلمانان دي،چې له اسلامي اړخه هم موږ پرې حق لرو. »
تراوسه پورې یوازې قطر او متحده اماراتو بشري مرسته کړې او شنونکي په دې باور دي،چې ښايي طالب مشرانو له ګاونډیو هېوادونو د مرستې غوښتنه نه وي کړي.
د سیاسي چارو شنونکی نجم الدین سیاس وايي:« د افغانستان اسلامي امارت ښايي تر اوسه پورې د مرستو غوښتنه نه وي کړي. که د افغانستان اسلامي امارت د مرستو غوښتنه وکړي، خامخا به له افغانستان سره مرستې شروغ کړي. خو له هر څه غوره دا ده،چې افغانستان نور پر خپله پر خپلو پښو ودرېږي. خلک یې باید کار ته پام وکړي.»
اخوا د طالبانو ویاند ذبیح الله مجاهد هم مني،چې افغانان له سختو اقتصادي ستونزو سره مخ دي،خو ډاډه دی،چې ګڼو هېوادونو له افغانستان سره د بشري مرستو ژمنه کړې او د هوايي ډګر په فعالیت سره به افغانستان ته مرستې راورسېږي.
مجاهد وايي:« زموږ هېواد له ستونزو سره مخ دی. فقر، اقتصادي ستونزې، ناروغي دا ټولې ستونزې شته.د سیمې بېلابېلو هېوادونو د درملو او خوراکي توکو برخه کې د مرستې ژمنه کړې. وړمه ورځ یوه اماراتي الوتکه راغله او په کابل هوايي ډګر کې ناسته وکړه، شااوخوا ۶۰ ټنه درمل او خوراکي توکي یې راوړل. تېره ورځ هم ځېنو هېوادونو مرسته کړې . عمان هم خبر راکړی، چې الوتکې ولاړې او تګ ته په تمه دي. موږ یوه ستونزه هوايي ډګر کې لرو، چې په هوايي ډګر کې لاهم تخنیکي ټیمونه کار کوي. کله چې عادي الوتنې پیل شي، موږ هېله لرو،چې ډېرې مرستې به راشي.»