د افغانستان د پراختیا او عدالت ګوند د یکشنبې په ورځ د «۱۴۰۰ کال د وږي پر ۱۴مه » د یوه خبري کنفرانس پر مهال له اسلامي امارت وغوښتل،چې د بهرنیو لاسوهنو مخنیوي، ترڅنګ له نړۍ سره ښې اړیکې جوړې کړي.
د یاد ګوند مشر سید جواد حسیني اندېښنه ښکاره کړه، که د افغانستان بهرنی سیاست سم مدیریت نه شي،له انزوا سره به مخامخ شي.
حسیني د واک تشه او د رسمي حکومت اعلان ځنډ د اندېښنې وړ بولي او پر طالبانو یې غږ وکړ،چې نوی حکومت دې اعلان کړي.
حسیني زیاته کړه:« د افغانستان راتلوونکی حکومت او مشران دې د افغانانو برخلیک ټاکلو کې لږ تر لږه د بهرنیو پرېکړو او نفوذ کچه راکمه کړي.
حسیني د یوې پوښتنې په جواب کې وویل، له شیعه مذهبو سره د طالبانو له چلند خوښ دي او د دوام غوښتنه یې لري.
نوموړي وايي، هېله من دی،چې هېواد سم لوري ته روان دی او له همدې امله په خپل هېواد کې پاتې او بهر ته د تګ اراده نه لري.
حسیني زیاته کړه:« موږ سیاسي کار کوو او ګوند لرو. بهر نه یو تللي. خبري کنفرانس ورکوو او د افغانستان راتلونکي په اړه هېله من یو. که څېرې د افغانستان راتلونکي په اړه هېله نه وو، یا مو د افغانستان په اړه د مسوولیت احساس نه درلود. ښايي اوس به دا خبري کنفرانس هم نه وه او ډېری ملګري به مو له هېواده تللي ول.»
د عدالت او پراختیا ګوند له نړیوالې ټولنې غواړي،چې له افغانستان سره بلا عوضه بشري مرستې وکړي او دغه هېواد ته شاه نه کړي.
