د افغانستان اسلامي امارت رسنیو دفتر غړی بلال کریمي وايي، د نوي حکومت د جوړېدو پرسر له سیاسیونو سره بحثونه وروستي شوي او ډېر ژر به نوی حکومت اعلان شي.
کريمي زیاته کړه:« د نوي حکومت جوړېدو په اړه تر اوسه پورې مشخص وخت نه دی ټاکل شوی،چې په کومه ورځ او کوم ځای کې به اعلان کېږي. خو یو څه ویلی شم،چې په ډېر نږدې وخت کې به د نوي حکومت اعلان وشي. کومې ناستې او مشورې،چې د نوي حکومت جوړېدو په اړه روانې وې، هغه بشپړې شوي دي.»
د مشرانو جرګې پخوانی مشر فضل هادي مسلمیار،چې طالب مشرانو سره یې د راتلونکي حکومت په جوړښت لیدنې او بحثونه کړي، وايي، نوی حکومت به ډېر ژر اعلان شي.
مسلمیار زیاتوي:« د راتلوونکي لپاره،چې څنګه یو نظام ولرو، د هغه نظام لپاره دوی مشورې کوي. زه باور لرم،د طالبانو کوم نیت،چې موږ ولېد، هغه ډېر پراخه دی. انشاء الله کومه ژمنه یې چې له موږ سره کړې، که هغه شان مخته ولاړ شي،دوی به یو بریالی او باثباته نظام ولري.»
د واک تشه او د نوي حکومت اعلان ځنډ په افغانستان کې د اقتصادي کړکیچ، فقر او ګڼو ستونزو لامل شوی او ټېنګار دا دی،چې طالبان دې ژر حکومت اعلان کړي.
د ولسي جرګې پخوانی غړی هلمند هلمند وايي:« زه پوهېږم، اوس افغانان په تشه کې واقع دي. دوی ته چوپړتیاوې نه رسېږي. خو د دې لوی بدلون په مقابل کې دا ډېرې ستونزې نه دي. د اسلامي امارت له مشرانو غوښتنه کوم،چې ډېر دقیق واوسي او ښه فکر وکړي، ترڅو په راتلونکې کې افغانستان له دې فرصته،چې د دوی لاس ته ورغلی، مثبته استفاده وکړي.»
تېره اوونۍ ګونګوسې وې،چې اسلامي امارت به د روانې اوونۍ په پیل کې نوی حکومت اعلان کړي،خو داسې ښکاري،چې د نوي حکومت پرسر لا بحثونه نه دي وروستي شوي او طالبان د خپلو مشرانو وروستۍ پرېکړې ته انتظار دي.
پرته له پنجشیر ولایته په ټول افغانستان د طالبانو له حاکمیت شل ورځې تیرېږي،خو تر اوسه پورې طالبانو خپل حکومت رسمي نه دی اعلان کړی.