Skip to content
د افغنستان حزب اسلامي مشر انجنیر ګلبدین حکمتیار د جمعې پر ورځ د «۱۴۰۰ کال د وږي پر ۱۲ مه » خپلو پلویانو ته د وینا پر مهال وویل،د پنجشیر ولس په دې پوه شي،چې یو شمېر کسان د خپلو شخصي ګټو لپاره له طالبانو سره مقاومت کوي او که ماتې وخوري، کولی شي،په چورلکو کې نورو هېوادونو ته ولاړ شي.
حکمتیار زیاته کړه:« زموږ پنجشیري وروڼه به دې متوجې وي،چې د دې جنګ بدې پایلې له بل هر چا ډېرې تاسو ته متوجې دي. تاسو ته به زیان رسېږي. د پردیو دا مزدوران به تښتي. د ټولو کورنۍ او شتمنۍ په بهر کې دي. ټول دوه تابعته دي. چورلکې یې هم د دې لپاره ځانه سره پنجشیر ته بیولي،چې په اسانۍ یوازې څو کیلومتره هاغه لور کولاب ته سفر وکړي.»
حکمتیار وايي، د دفاع پخواني وزیر بسم الله محمدي خپلو کسانو ته ویلي، چې چورلکې پنجشیر ته بوځي او له یو شمېر هېوادونو غواړي، چې د پنجشیر مقاومت دې په رسمیت وپېژني.
د حزب اسلامي مشر د پنجشیر له خلکو وغوښتل، چې خپل ځانونه دې د نورو شخصي ګټو لپاره نه قرباني کوي او اجازه دې ورنه کړي، چې هلته د جګړې اور بل شي.
حکمتیار وايي:« د دفاع وزیر ته یې لارښوونه وکړه،څومره چورلکې،چې کولای شي، له ځانه سره یوسي. هغه ۱۷ چورلکې پنجشیر ته انتقال کړې. دغه راز کافي مهمات او تجهیزات یې هم انتقال کړل. نه یوازې اجازه یې ورکړې،بلکې هڅولی یې دی، مرسته یې ورسره کړې،ترڅو دا کار وکړي. نن چې تاسو هلته چورلکې ګورئ، دا هماغه دي،چې ده له ځانه سره بیولې وې.»
حکمتیار په خپلو خبرو کې وویل، په افغانستان کې د امریکا هېڅ ارمان نه دی پوره شوی او وروستیو ورنکاریو وښوده،چې د افغانستان ولس سره عقده لري او د بریدونو له لارې یې خپل غچ واخېست.
په ورته وخت کې حکمتیار د تاجکستان په ګدونو له ځنو نورو هېوادنو هم وغوښتل، چې په افغانستان کې له لاسوهنې ډډه وکړي.
حکمتیار زیاتوي:«د کابل له نړیوال هوايي ډګره د دوی وروستي ځواکونو وتلو څرنګوالي وښووله،چې له افغانانو د غچ اخېستلو له هوډ ارادې سره هغوی له افغانستانه بهر شول. په هوايي ډګر کې پراخ وحشيانه تخریب او ټول تجهیزات او وسایل، ټولې ملکي او نظامي طیارې، ټانګونه،موټرې،ان ملکي موټر، د دفترونو څوکۍ،میزونه، کمپیوټرې په بشپړه توګه تخریب او وېجاړ کړي دي.»
حکمتیار ډاډ وښوده،چې اوس افغانستان یو خپلواکه هېواد دی او د پنجشیر له ستونزې وروسته به په افغانستان کې یوه تلپاتې سوله ټینګه شي، هغه خلک نوي جوړیدونکي حکومت سره کار ته وهڅول.
