په هېواد کې د طالبانو واکمنۍ ښځو ته د کاري فعالیتونو پر وړاندې اندیښنې پیدا کړي دي.
یو شمېر فعالې ښځې وايي، له اسلامي امارته غواړي،چې پر خپلو ژمنو عمل وکړي او ښځو ته دې په راتلونکي حکومت کې ونډه ورکړي.
دوی زیاتوي،که طالبان د بهرنیو هېوادونو ملاتړ او دوامداره مرستې غواړي،په سیاسي برخه کې دې ښځو ته پراخ حضور ورکړي او له ظرفیتونو دې ګټه واخېستل شی.
پخوانۍ افغان سفیره شکریه بارکزۍ وايي:« افغان مېرمنې د افغانستان ستره پانګه ده. له دغې پانګې باید په سمه، مثبته او مقعوله بڼه استفاده وشي. پرېږدئ،چې افغانې ښځې د افغانستان په بسیاینه او پرمختګ خپل نقش ولوبوي.»
یوشمیر نورې ښځې بیا د تېرو دوه لسیزو د لاسته راوړنو په ساتنه ټینګار کوي او له طالبانو غواړي،چې د خپل حکومت د بقا لپاره دې کړې ژمنې عملي کړي.
د ښځو حقونو فعاله سحر ساحل وايي:« که چېرې اسلامي امارت په افغانستان کې د واک بقا غواړي، نو باید له هغو ښځو،چې تعلیم یې کړی دی، په هره برخه کې په سمه بڼه ترې استفاده وکړي. »
افغانې ښځې داسې مهال د خپلو حقونو پر خوندیتوب ټینګار کوي،چې طالب چارواکو وار له مخه د ښځو حقونو د خوندیتوب ډاډ ورکړی او ویلي یې دي، هغو حقونو ا و ازادۍ ته ژمن دي، چې اسلام دین ورکړي دي.