د اسلامي امارت د مطبوعاتو غړی بلال کریمي وايي:« د اسلامي امارت پالیسي په دې اړه ډېره واضح ده. کله چې حالت نورمال شي، وروسته له هغې،چې امریکايي ځواکونه له هېواده ووتل او هوايي ډګر په بشپړ ډول د اسلامي امارت ځواکونو تر کنټرول لاندې راغی. اسلامي امارت هڅې کوي، ترڅو د هوايي ډګر چارې بېرته عادي حالت راوګرځي او بهرنۍ الوتنې پيل شي. کله چې حالت نورمال شي او له هوايي ډګره الوتنې پيل شي،ټول هغه کسان،چې اسناد ولري او غواړي، بهر ولاړ شي، اسلامي امارت به هغوی ته لاره برابره کړي. هغوی بیا کولای شي،چې له قانوني لارو سره سم په بهرنیو هېوادونو کې ارامه د عزت ژوند ولري.»
په هېواد کې د بهرني پوځي حضور پایته رسېدو او په ا فغانستان د طالبانو حاکمیت سره زرګونه کسان بې روزګاره شوي او ډېری خلک هڅه کوي له هېواده بهر ولاړ شي.
د سیاسي چارو شنونکی محمد نبي افغان وايي:« تر ډېره،چې د طالبانو ژمنو ته ګورو، دوی خپلو ژمنو ته ژمن دي. خو زه فکر کوم، دا د هېواد لپاره یوه خلا رامنځته کېږي او راتلونکی مو به لو ستونزو سره مخ شو. امریکا او یا نور هېوادونه هغه ځوانان له موږ او تاسو غواړي،چې یوسي،د بیلګې په ډول یو څوک باغ جوړ کړي، حاصل ته چمتو شي او حاصل بل څوک وخوري. نو دا په اساسي ډول زموږ پر ګټه نه ده،چې ځوانانو مو بهر ولاړ شي. »
ځیني نور بیا وایي،د علمي کدرونو له لاسه ورکول به هیواد له یوه بل بحران سره مخ کړي.
د ملګرو ملتونو امنیت شورا هم یو پرېکړه لیک تصویب کړ او له طالبانو نه په کې غوښتنه شوې،چې په خپلو ژمنو عمل وکړي او بهر ته د هغو کسانو د تګ مخنیوی دې نه کوي،چې اسناد او مدارک لري.
پرېکړه لیک کې دغه راز راغلي دي،چې باید د افغانستان خاوره د هېڅ یوه بل هېواد پر ضد ونه کارول شي.