په کابل کې د سې شبنې په ورځ د « ۱۴۰۰ کال د وږي پر ۹ مه» د سویل ختیځ زون د ولسونو شورا غړو او مسوولینو د خبري کنفرانس پر مهال په اوسني وضعیت کې د نوي حکومت پر ژر جوړېدو ټينګار وکړ.
دوی له طالبانو وغوښتل،چې د راتلونکي حکومت د جوړېدو لپاره دې هڅې ګړندۍ کړي.
د یادې شورا غړی اظهار الحق امین وايي:«زموږ لومړۍ غوښتنه یا سپارښتنه د افغانستان له اسلامي امارته دا ده،چې ژر تر ژره باید حکومت جوړ شي. که ان یو ساعت هم ناوخته یا وخت پرې ووځي،ولس او هېواد له ډېر لوی زیان سره مخ کېږي.»
دلته د سویل ختیځ زون د ولسونو شورا غړو په تیر حکومت کې د فساد په شتون هم نیوکې درلودې او له اسلامي اماراتو یې وغوښتل چې د څوکیو یو شمیر ټيکه دارانو ته د بیا فساد موقع ورنکړي.
د سویل ختیځ زون ولسونو شورا غړی وايي:« زموږ هېله دا ده،چې هغه فرصت طلبه څېرې،چې نورد هغو نوم اخېستو سره مو خولې له زهرو ډکېږي، په نوي حکومت یې ونه ګورو. دا زموږ لومړنۍ هېله ده. د څوکیو هغه ټیکه داران،چې د افغانستان د خلکو ستونزې د هغوې په وجود کې وې، په نوي حکومت کې یې ونه ګورو. نوې څېرې باید راشي.»
