د افغان سولې له پاره د امريکا متحده ایالتو بهرنیو چارو وزارت ځانګړی استازی زلمی خليل زاد وايي،که طالبان پر خپلو ژمنو عمل وکړي، امريکا او متحدين يې هم چمتو دي، چې خپلې ژمنې عملي کړي.
په ورته وخت کې خلیل زاد وايي، د طالبانو خبرو نه بلکې عمل ته ګوري او د نړۍ اړیکې د شویو ژمنو پر اساس دي.
خلیلزاد د طالبانو د سیاسي رهبري غړي عباس ستانکزي وروستيو څرګندونو ته په اشارې وايي، دا غوره خبره ده،چې د اګسټ له ۳۱ مې وروسته طالبان پر خپله د کابل هوايي ډګر د امنیت مسوولیت اخلي.
د سیاسي چارو شنونکی ډاکټر زرعلي معروف وايي:« په اوسني وخت کې د واکمنو لپاره تر ټولو مهمه له نړۍ سره د ډيپلوماتېکو اړېکو جوړول دي. موږ له نړۍ سره د اړېکو جوړولو سره کولای شو،چې پراخه مالي مراستې راجذب کړو او په افغانستان کې دغه اوسنی پر ټپه ولاړ حالت،چې په اقتصادي لحاظ باندې افغانان او په ځانګړي ډول نظام له ډېر ګواښونو سره مخ دی. موږ باید دې ته حرکت ورکړو. »
د دوی په خبره که طالبان یوازې د تیرو شلو کلونو د لاسته راوړونو په ساتلو او د هغو ژمنو پر عمل د نړیوالې ټولنې باور او ملګرتیا ترلاسه کولای شي،چې سیمه ییزو هېوادونو او د نړیوالې ټولنې ا ستازو سره یې کړي دي.
د سياسي چارو شنونکی ډاکټر زرعلي معروف وايي:« د افغانانو لپاره هغه وخت هېله ورکولای شو،کله چې امریکا، نړیوال او موجوده نظام پر خپلو ژمنو باندې ودرېږي او په ټوله کې د افغان ملت ارزښتونه، لومړیتوبونه او د هغوی ګټې په نظر کې ونېسي.»
د اسلامي امارت د فرهنګي چارو د کميسيون مشر او ویاند ذبیح الله مجاهد بیا وايي، له نړيوالو سره د ښو اړيکو غوښتونکي دي.
مجاهد زیاتوي:«دغه هېوادونه،چې سفیران یې دلته دي او یا نور هېوادونه،چې غواړي، دلته راشي او سفارتونه خلاص کړي، د ټولو لپاره زموږ پیغام دا دی،چې درناوی ورته کوو. موږ له هغوی سره ښیې اړېکې غواړو. موږ د افغانستان خلک دې ته اړتیا لرو،چې له ملتونو او هېوادونو سره ښیې اړېکې ولرو. دا زموږ د هېواد د راتلوونکې پر ګټه او هم د نورو هېوادونو پر ګټه ده.»
زلمی خلیلزاد وروسته له هغې دا څرګندونې کړي،چې څو ورځې وړاندې د طالبانو د سیاسي رهبرۍ غړي شېرعباس ستانکزي ډاډ وښود، چې نړۍ سره ښيې اړیکې لري او په افغانستان کې راتلونکی حکومت به ټول شموله وي.
