د افغانستان صنعت او سوداګرۍ خونې غړی خان جان الکوزی وايي، له اوسني روان حالته ویره لري او په خبرهر یې که دوام وکړي، افغانان به له لوی اقتصادي بحران سره مخ شي.
الکوزي زیاته کړه:«د دې بدلون پر اساس،اقتصادي ماشین،هغه شان چې وړاندې یې حرکت کاوه، اوس درېدلی او ماتې سره مخ شوی دی. تجارتي راکړه ورکړه هغه شان،چې اړېنه وه، اوس نه کېږي. لېږد رالېږد پر وخت نه ترسره کېږي. په سرحداتو او ګمرکونو کې فساد له منځه تللی دی او اوس هغه ستونزه نه شته. همدارنګه اوس په ګمرکونو کار هم ډېر ژر خلاصېږي. »
الکوزی وايي، که نوی حکومت اعلان نه شي، لیرې نه ده،چې افغانستان له لوی اقتصادي بحران سره مخ شي.
هغه زیاته کړه: « زما هېله دا ده،چې ژر دولت جوړ او سیسټم فعاله شي. مسلکي کسانو ته زمینه برابره شي، ترڅو بېرته راشي.»
اخوا سوداګر که څه هم خوښ دي،چې په بندرونو کې د فساد مخه نیول شوې،خو په خبره یې لا هم مسلکي کسان نه دي ګومارل شوي.
سوداګر طلا محمد اتمانزی وايي:« افغانستان کې تاسې پوهېږئ،چې وړاندې له هراته تر کابله پورې له یوه موټر څخه له ۲۰ تر ۳۰ زره افغانۍ اخېستل کېدې. باج اخېستل کېده، رشوت وه. همدرانګه په بېلابېلو نومونو پارچې او مالیې وې، چې په اخر کې راکنټرول شوي وو. که دغه اضافي مصارف کم شي، نرخنامه وټاکل شي، موږ هڅه کوو،خو که چېرې ډالر ښکته نه شي، هېڅ امکان نه لري،چې په نرخو کې ښه والی راشي.»
سوداګر د نرخونو د بېرته ښکته کېدو لپاره له طالبانو غواړي،چې مالونه دې ورته نه محصول کوي، تر څو دوی په بازارونو کې خپل توکې په ټيټه بیه وپلوري.
