Skip to content
په هرات کې د طالبانو له واکمنۍ نږدې پنځلس ورځې تېرېږي،خو ښار کې تر اوسه پورې د چارو عادي کېدو او بیو کنټرول لپاره کوم ګام نه دی اخېستل شوی.
ځايي خلک وايي، له یوې خوا د بېکارۍ کچه لوړه شوي، فقر زیات شوی او له بل لوري د د خوراکي او غیر خوراکي توکو بیې د پام وړ لوړې شوي دي.
هرات ښار کې یو تن هټیوال وايي:« د توکو بیې خورا لوړې شوي دي. د بیلګې په ډول وړاندې د یوې بورۍ اوړو بیه په ۱۵۸۰ افغانۍ وه،خو اوس په ۱۹۲۰ افغانۍ شوې. د غوړیو او ورېجو بیې هم همدا شان لوړې شوي دي. د ټولو توکو بیې لوړې شوي دي.»
دغه راز د نوي حکومت په راتګ سره بانکونه تړل شوي او ګڼو کسبګرو چارې لا نه دي پيل کړي.
خلک نیوکه کوي،چې له یوې خوا فقر او بې روزګاري زیاته شوې او له بل لوري بیې د پام وړ لوړې شوي دي.
د هرات ښار یو تن اوسېدونکی وایي:« د ټولو توکو بیې لوړې شوي دي او څوک یې د پېرلو وس نه لري. »
غوښتنه دا ده،چې طالبان باید له نورو هېوادونو سره خپلي اړیکي پراخې او راکړه ورکړه عادي کړي.
اخوا د هرات سوداګرۍ خونې مرستیال سعید صدیقي بیا د بیو لوړېدو لامل له نورو هېوادونو څخه د توکو رالېږد کموالی بولي.
صدیقي زیاته کړه:« زه په ډاډ سره ویلی شم،چې واردات مو د تېر پرتله ډېر کم شوي دي.»
هرات کې د هرې بورۍ اوړو، غوړیو او وریجو په بیو کې درې تر څلور سوه افغانیو پورې لوړ والی راغلی دی.
ځايي چارواکي وايې هڅه کوي،چې واردات ډېر او بيې عادي حالت ته را وګرځوي.
دغه راز هلته د خوراکي توکو ترڅنګ د سون توکو بيې هم د تېر په پرتله د پام وړ لوړي شوي دي.
خلک د وضعیت د کنټرول او نورو چارو عادي کېدو په اړه د طالبانو له لوري د اقداماتو غوښتنه کوي.
