ناټو د بهرنیو ځواکونو له وتلو وروسته د کابل نړیوال هوايي ډګر د ساتنې مسوولیت ترکیې ته سپاري.
د کابل هوايي ډګر د امنیت ساتلو پر سر له څو میاشتو راهیسې د ناټو غړو هېوادونو ترمنځ ناندرۍ روانې دي، چې دغه مسوولیت د دې سازمان غړي هېواد ترکیې ته ورکړي.
ترکیې له وړاندې د کابل نړیوال هوايي ډګر ساتنې مسوولیت اخیستو ته ټټر وهلی دی.
د ترکیې ولسشمر رجب طیب اردوغان وايي، ترک چارواکي د روانې میاشتې پای کې د بهرنیو ځواکونو له وتلو وروسته د افغان پلازمېنې کابل هوايي ډګر چارو سمبالولو کې د مرستې پر موضوع له طالبانو سره مخامخ خبرې کوي.
اردوغان زیاته کړې: «ترک چارواکو له طالبانو سره درې نیم ساعته خبرې کړي او په وینا یې طالبانو د ترکانو له خوا په داسې صورت کې د هوايي ډګر چارو سمبالښت ته چمتوالی ښوولی دی، چې د امنیت مهمې چارې به یې خپله طالبان سمبالوي او د تخنیکي عملیاتو برخه به یې ترکان سمبالوي.»
خو طالبان د کابل هوايي ډګر امنیت او تخنیکي چارو مسولیت په تړاو ترکیې هېواد ته سپارل ردوي.
د اسلامي امارت ویاند ذبیح الله مجاهد وايي: «موږ هغه راپورونه ردوو چې د ترکیې له هېواد څخه غوښتنه شوې ده چې د کابل هوايي ډګر د امنیت او نورو برخو کي دي له اسلامي امارت سره مرسته وشي.»
د کابل هوايي ډګر کې دا مهال امریکايي او بريټانوي ځواکونه دېره دي او د هوايي ډګر شااوخوا امنیت د طالبانو له خوا نیول شوی دی.