د اسلامي امارت د فرهنګي کمېسیون مشر او ویاند ذبیح الله مجاهد د سه شبنې ورځ د« ۱۴۰۰کال د وږي پر ۲ مه» له شمشاد ټلوېزیون سره په خبرو کې وویل، د پنجشیر ولایت مشرانو او جهادي قوماندانو سره یې خبرې روانې دي او ژر ده، چې دغه ولایت په سوله ییزه توګه له اسلامي امارته خپل ملاتړ اعلان کړي.
مجاهد زیاته کړه:« موږ د پنجشینر له ولس سره په اړېکه کې یو. له علماوو، مشرانو، متنفذینو، جهادي مشرانو سره مو خبرې روانې دي. دا خبرې داسې حد ته رسېدلي،چې په نږدې وخت کې به دغه ستونزه بې له جګړې هواره شي. زه ویلی شم،چې ۸۰ سلنه به جګړې ته اړیتا پېښه نه شي. موږ نن کوم مالومات،چې لرو، هغه دا دي،نږدې ده،چې یو تفاهم وشي او هلته وروستي مزاحمتونه،چي دي،هغه هم پای ته ورسېږي.»
مجاهد وايي، جګړه د حل لار نه ده،که بیا هم په پنجشیر کې میشت ځواکونه د جګړې لار غوره کړي،نو دغه دره یې له څلورو اړخونو کلا بنده کړې.
هغه زیاتوي:« موږ په هېڅ صورت جنګ نه غواړو. که مجبور نه شو، زموږ له اړخه به جنګ نه پیل کېږي. سره له دې،چې ځواکونه مو د پنجشیر شااوخوا ته رسېدلي او د بدخشان،تخار، بغلان، نورستان، او لغمان له خوا د پنجشیر سیمو ته داخل شوي دي. زموږ ځواکونه ګلبهار ته هم رسېدلي دي. په هر صورته موږ نه غواړو،چې مسله جنګي شي او مسله ستونزو ته ولاړه شي. »
په ورته وخت کې مجاهد په پنجشیر کې د میشت ځواکونو مشرانو ته ډاډ ورکوي،که کابل ته راشي،نو امنیت به یې خوندي وي او ارامه ژوند به ولري.
مجاهد وايي:« زه ډاډ ورکوم،که د پنجشیر خلک وي، که له بل ځایه څوک راشي،د تېر نظام خلک وي، لوړپوړي کسان یې وي، هېڅا ته به امنیتي ستونزه نه وي. دلته دوی د ارامه ژوند، د ښه ابرومندانه ژوند حق لري او زمینه به ورته برابرېږي. که موږ د دوی اندېښنه حس کړو، هغه اندېښنه به یې رفعه کوو. »
پنجشیر یوازینی ولایت دی،چې لاهم طالبان نه دي ورغلي او له دغه ولایته د طالبانو پر وړاندې د جګړې او مقاومت خبرونه خپریږي.
