د امریکا دفاع وزارت وایي، ټول تمرکز یې پر دې دی، چې د روانې اګسټ میاشتې تر پایه له کابله د افغان کارکوونکو او ګواښ سره د مخ افغانانو د ایستلو بهیر بشپړ شي.
امریکا دغه پرېکړه د طالبانو له هغه خبرداري وروسته کړې، چې له اګسټ وروسته په افغانستان کې د امریکایي ځواکونو د پاتې کېدو نېټه نه غځوي.
بایډن بیا کابل هوایي ډګر ته په اشارې له وړاندې ویلي و، چې ښایې دوی له اګسټ وروسته هم افغانستان کې پاتې شي.
پنټاګون وایي، یوازې تېره یوه اونۍ کې امریکا او ملګرو هېوادونو یې له کابله نږدې دېرش زره افغانان خوندي ځایونو ته انتقال کړي دي.
پر کابل د طالبانو له ولکې ورسته خلک پر کابل هوایي ډګر ورټول دي، چې د ګڼې ګوڼې او له الوتکو د لوېدو پېښو کې تر اوسه لسګونو کسانو ته مرګ ژوبله هم اوښتې ده.