د ناټو غړو هېوادونو بهرنیو چارو وزیرانو د افغانستان په اړه ځانګړې ناسته کې ویلي، د طالبانو راتلونکی حکومت به تر هغې په رسیمت و نه پیژني،ترڅ له القاعدې او داعش ډلو سره یې اړیکې نه وي پرې کړي.
دوی ویلي، طالبان باید د ښځو او بشر حقونو درناوی وکړي او افغانستان کې خلکو ته د وتلو لار ورکړي.
سټولټنبرګ زیاته کړه:«ناټو یو هېواد نه دی،چې کوم هېواد په رسیمت وپیژني،بلکې دا کار د ناټو غړو هېوادونو له خوا ترسره کېږي. که د افغانستان راتلونکی حکومت پر خپلو هغو نړیوالو ژمنو عمل ونه کړي،چې له امریکا سره یې د تړون پر مهال کړې وې، په رسیمت به ونه پیژندل شي.»
سټولټنبرګ چې له غونډې وروسته له خبریالانو سره خبرې کولې وویل، دا چې پاکستان د افغانستان نږدې ګاونډي دی او له طالبانو سره هم اړیکې لري، نو د نوي حکومت په رسیمت پیژندلو کې یې ونډه هم د پام وړ ده.
هغه وویل،که افغانستان کې با ثباته حکومت رامنځته شي،د پاکستان په ګډون د ټولو هېوادونو په ګټه دی.
سټولټنبرګ زیاته کړې:«زه فکر کوم،چې پاکستان یو خاص مسوولیت لري،تر څو افغانستان خپلو نړیوالو ژمنو ته ژمن پاتې کړي او یاد هېواد بیا د ترهګرو پر ځالې بدلیدو ته پرینږدي. یو باثباته افغانستان یوازې د پاکستان نه بلکې د ټولو هېوادونو پر ګټه دی.»