په پام کې ده، چې سبا سې شنبه بریتانیا په افغانستان کې د روان وضعیت په اړه د بېړني بحث لپاره د نړۍ د اوو سترو صنعتي هېوادونو سرمشریزه راوبلي.
د برتانیا لومړي وزیر بوریس جانسن ویلي، د افغانستان په اړه دې د ‘جي ۷’ هېوادونو سرمشریزه جوړه شي.
بوریس جانسن ویلي، نړیواله ټولنه دې انلاین غونډه جوړه کړي او په افغانستان کې د بشري بحران مخه دې ونیسي.
هغه دغه راز ویلي، نړۍ دې د تېرو شلو کلونو د لاسته راوړنو په خوندي کولو کې د افغانانو ملاتړ وکړي.
سپینې ماڼۍ هم منلې، چې ولسمشر جو بایډن به له افغان کډوالو سره د بشري مرستو په ګډون د افغانستان پر روان وضعیت د بحث لپاره د «جې اوه» ډلې په غونډه کې برخه واخلي.
امریکا، بریتانیا، فرانسه، جرمني، ایټالیا، کاناډا او جاپان د جې اوه غړي هېوادونه دي، چې سږ کال یې مشري بریتانیا کوي.