خو طالبان له ټولو افغانانو غواړي،چې اروپا، امریکا او نورو هېوادونو ته له تللو دې ډډه وکړي او په خپل هېواد کې دې پاتې شي.
طالبان وایي، افغانستان د ټولو کور دی،هر افغان ته اړتیا لري او دوی هڅه کوي،چې ژر تر ژره ټول منلی حکومت جوړ کړي.
طالبان وایي، دغه کسان په بد وضعیت کې دي او ترې غوښتنه کوي چې خپل هېواد دې نه پرېږدي او دلته دې پاتې شي.
د کابل اقتصادي برخې مسوول مولوي احمد جان وايي:« خلک الوتکې پورې نښلي. د بیلګې په ډول بهر ته روان دي، ولي روان دي؟ دا باید راوګرځوو. دا زموږ وروڼه دي. داسې وېره شتون لري، یا چا وېرولي دي، دا جدا مسایل دي. د دوی لپاره نه کار کول، زموږ کار نه دی،دا د مخکې نظام کار دی. کاش! کار ورته پيدا شوی وی. دلته ورته کارخونې جوړې شوې وې. »
هغه وايي،په هېواد کې ډاډمنه او امن فضاء برابرول یې موخه ده او د پرمختګ لپاره به هڅې ګړندۍ کړي.
اخوا د طالبانو ترڅنګ صنعت کاران هم له افغانانو غواړي،چې دلته پاتې شي او بهرنیو هېوادونو ته له ورتګ ډډه وکړي.
صنعت کاران وایي، دوی ورته د کار کولو زمینه برابروي او افغانان دې خپله انرژي په خپل هېواد کې مصرف کړي.