له امریکا او بریټانیا وروستته کاناډا هم په پام کې لري،چې افغانستان ته خپل ځانګړي ځواکونه راولېږي.
که څه هم کاناډا تر اوسه پورې د خپلو سرتېرو شمېر او نیټه نه ده په ډاګه کړې، خو امریکا وایي، ۳ زره عسکر یې راتلونکو ۴۸ ساعتونو کې کابل ته رارسېږي.
د امریکا دفاع وزارت ویاند جان کربي وايي:« په لومړي پړاو کې درې هغه پیاده کنډوکونه شامل دي،چې دمګړی په مرکزي قوماندانۍ کې پر دندو بوخت دي. دا ۳ زره سرتېرې په راتلونکو ۲۴ یا ۴۸ ساعتونو کې د حامد کرزي نړیوال هوایي ډګر ته رسېږي. د یادو کنډکونو له ډلې یې یو د امریکا اردو او دوه نور یې د سمندري ځواکونو دي.»
کربي د هغې پوښتنې په ځواب کې چې آیا له دې نور اضافي سرتېرې هم افغانستان ته لیږي او که نه داسې وویل:« له دې سربېره به د ۴ زرو سرتېرو یوه بله ډله هم له شمالي کارولینا څخه کویټ ته ځي او په افغانستان کې به د میشتیدونکو سرتېرو لپاره د منتظره قطعې په توګه ځای پر ځای شي.»
امریکا که څه هم ټینګار کوي،چې یاد سرتېرې یوازې له افغانستانه د خپلو دیپلوماتانو اېستلو لپاره استوي،خو د حزب اسلامي مشر ګلبدین حکمتیار وایي، دا پلمه ده او یاد سرتېرې د جګړې لپاره راستول کیږي.
له امریکا سره په هم مهالي ډول بریتانیا هم د همدې موخې لپاره خپل شپږ سوه سرتېري کابل تا رالیږي.