د پنټاګون ویاند جان کربي ويلي، د امریکا پوځ د طالبانو چټګ پرمختګ ته اندېښمن دی او په خبره یې اوس یې وخت دی، چې افغان مشران او سرتېري یو موټی شي.
جان کربي کابل ته د تازه دمو امریکايي سرتېرو د رسېدو پخلی هم کړی، خو دایې نه دي ویلي، چې تازه راغلي سرتېري به یې په جګړه کې برخه اخلي او که نه.
د کابل حامد کرزي هوايي ډګر ته رسېدلي امریکايي سرتېرو په اړه ویل کېږي، چې د امریکايي دیپلوماتانو په ایستلو کې به مرسته وکړي.
له بل لوري د امریکا استازو جرګې غړي لینډسي ګراهام له افغانستانه د بهرنیو ځواکونو پر ایستلو نیوکې کړې دي.
پرون ورځ لینډسي ګراهام ویلي، لا هم طالبان له القاعده شبکې او داعش ډلې سره اړیکې لري او په خبره یې دا چاره د امریکا د ملي امنیت په ګټه نه ده.
ګراهام پر خپل تویټر لیکلي، له افغانستانه د دوی ټاټوبي ته د ګواښ مسئله به د وخت په تېرېدو سره مالومه شي.
نوموړي هیله څرګنده کړې چې له افغانستانه د بهرنیو ځواکونو د وتلو په اړه د ولسمشر بایډن پرېکړه له سره وارزول شي.