افغان لسمشر محمد اشرف نن شنبه د « ۱۴۰۰ کال د زمري پر ۲۳مه» د هېواد روان امنیتي وضعیت په اړه په یوه لنډ ویډیويي پیغام کې وویل، په هرڅه خبر دی او نه غواړي چې افغانستان کې تپل شوې جګړه نوره هم پراخه شي او شلو کلونو لاس ته راوړنې له ګواښ سره مخ شي.
غني زیاته کړه: «د یوه تاریخي رسالت له مخې هڅه کوم، پرې نه ږدم،چې د افغانستان پر خلکو تپل شوې جګړه نوره هم د بې ګناه خلکو د وژنې، د شل کلونو لاس ته راوړنو، د عامه تاسیساتو د له منځه وړو او د دوامدارې بې ثباتۍ لامل شي.»
اوس چې د جګړې لیکه کابل ته په رالنډېدو ده، ولسمشر غني خپلو خبرو کې د امنیتي ځواکونو د انسجام خبر ورکړی دی، چې په اړه یې جدي هڅې پیل کړي او په دې اړه یې په کور دننه او بهر مشورې روانې کړي دي.
غني وايي: «په اوسني وضعیت کې د امنیتي او دفاعي قواوو بیا انسجام زموږ لومړیتوب ده او په دې هکله جدي اقدامات تر لاس لاندې دي.»
ولسمشر غني دغه راز وویل، نور نه غواړي، افغانستان کې بې ثباتي تر دې هم پراخه او تاوتریخوالی زیات شي.
غني ډاډ وښود چې د خلکو د وژنې مخنیوی به کوي.
غني زیاتوي: «زما ټول تمرکز پر دې ده، ترڅو د پراخې بې ثباتۍ ،تاوتریخوالي او د خلکو د بې ځایه کېدو څخه مخنیوی وکړم.»
په حکومت کې دننه هڅې روانې دي چې څنګه کېدای شي د وضیعت په ښه کېدو یو حل لارې ته ورسیږي.
د ولسمشر تازه پیغام له هېلو او ناهېلو سره مخ دی، خو ټینګار په دې ده چې افغانستان کې روان وضعیت باید ژر کنټرول کې شي.