Skip to content
د ۲۰۳ تندر قول اردو قوماندان نن چهار شنبه د « ۱۴۰۰ کال د زمري پر ۲۰مه » له قومي مشرانو سره د یوې ناسې پر مهال وویل، د پکتیا پر مرکز ګردیز ښار د وسله والو طالبانو د ډله ییز برید پلان مو شنډ کړی او دغه ډله به ونه شي کړی،چې سویل ختیځ زون کې پر لویو ښارونه بریدونه تر سره کړي .
لونګ وايي، د وسله والو جنګي ماشین یې له منځ وړی او وروستیو ورځو کې یې د هغوي کلیدي کسان وژلي دي.
لونګ زیاته کړه:«امنیتي ځواکونو سویل ختیځ زون او په ځانګړي ډول د ګردیز ښار د سقوط په اړه د وسله والو پلانونه پلانونه پنځه اتیا سلنه شنډ کړي او د شنډیدو په حال کې دي.»
لونګ وایي، سویل ختیځ زون او په ځانګړي ډول پکتیا کې د جګړې مشري پاکستاني نظامیان کوي او امنیتي ځواکونه توانیدلي، چې د پرمختګ مخه یې ډب کړي .
لونګ زیاته کړه:« نړیوال استخبارات او په ځانګړي ډول پاکستاني استخبارات دلته جګړه کې ښکیل دي. زموږ ګاونډي هېوادونه لکه د پاکستان نظامیان دلته د جګړې مشري پر غاړه لري،خو امنیتي ځواګونو ځپلي دي.»
بل پلو د پکتیا والي ګل بني احمدزی هم ګردیز ښار کې د امنیت خوندیتوب ډاډ ورکوي او وایي، د خلکو لپاره د ډاډمنې فضاء رامنځته کول یې لومړیتوب دی.
احمدزي زیاته کړه:« د ګردیز ښار اوسېدونکو امنیت او عزت ساتلو لپاره شپه او ورځ پر هڅو بوخت یو لومړیتوب مو امنیت دی. خلک دې په دې برخه کې اندیښنه نه کوي.»
خو طالب ویاند ذبیح الله مجاهد خپلو لیکو کې د بهرنیو او په ځانګړي ډول د پاکستاني وګړو موجودیت ردوي او وایي، امنیتي چارواکي په دا ډول څرګندونو د خپلو نیمګړتیاوو د پټولو هڅه کوي.
