د ملي روغې جوړې عالي شورا مشر عبدالله عبدالله او د سولې په چارو کې د دولت وزیر سید سعادت منصور نادري د افغان سولې په تړاو ځانګړې ناسته کې د ګډون لپاره تېره شپه قطر ته تللي.
ټاکل شوې، چې نن به په قطر کې د افغان سولې په تړاو ناسته وشي او په دغه پروسه کې د ښکیلو هېوادونو ځانګړي استازي به په کې برخه واخلي.
دا ناسته د قطر په کوربتوب او د امریکا او ملګرو ملتونو په همکارۍ جوړېږي، چې دوه ورځې به دوام وکړي.
غونډه کې به د روسیې، چین او پاکستان ځانګړي استازي هم ګډون وکړي، خو طالبانو لا نه ده روښانه کړې، چې ګډون کوي که نه.
غونډه کې به د ښکیلو هېوادونو ترمنځ د همغږۍ پر زیاتېدو، د سولې پروسې پر چټکتیا او د تاوتریخوالي کمښت پرسر بحث وشي.
د قطر په کوربتوب دغه ناسته داسې مهال جوړېږي، چې طالبانو اوسمهال د ولسوالیو له سقوط وروسته د ولایتونو د نیولو لپاره جګړه زیاته کړې ده.