د جرمني د دفاع وزیرې انګریټ کرمپ کارنباور ویلي، له افغانستانه د بهرنیو ځواکونو د وتلو پرېکړه پر ځای وه.
انګریټ کرمپ کارنباور افغانستان ته د جرمني ځواکونو د بیا رالېږلو احتمال رد کړی او زیاته کړې یې ده، چې د طالبانو د ماتولو لپاره اوږدې او سختې جګړې ته اړتیا ده.
د مالوماتو له مخې، د جرمني ډېری ځواکونه په کندز کې ځای پر ځای وو، چې اوس یې د کندز پر امنیتي وضعیت اندېښنه هم ښودلې ده.
بل پلو د امریکا لوی درستیز جنرال مارک میلي له افغان ځواکونو د ملاتړ خبره کړې ده.
میلي ویلي، افغان ځواکونه کافي وړتیا لري او دوی یې ملاتړ ته دوام ورکوي.
نوموړي زیاته کړې، که ولسمشر جو بایډن او د امریکا دفاع وزیر ورته لارښوونه وکړي، دوی به د افغان ځواکونو ملاتړ ته دوام ورکړي.