لویه څارنوالي وايي، دا برید پرون ورځ د کابل په ده سبز ولسوالۍ کې د عدلي مرکز او د بګرام زندان د موظفو څارنوالانو پر موټر شوی دی.
د لویې څارنوالي په اعلامیې کې راغلي، چې برید کې طوفان عمري او یو بل موظف څارنوال سید کاظم وژل شوي او یو بل څارنوال ژوبل شوی دی.
لویې څارنوالۍ دا برید غندلی او هغه یې د بشري جنایت، د عدالت، سولې او افغانستان د خلکو له ثبات سره دښمني بللې ده.
طوفان عمري د پکیتا غږ سیمه ییزې راډیو د نشراتو مسئول هم و او د ازادو رسنیو د ملاتړ له ادارې (نۍ) سره یې هم کار کاوه.
د برید مسولیت تر اوسه کومې ډلې په غاړه نه دی اخیستی، څو ورځې مخکې ناپيژاندو کسانو کابل کې د طوفان عمري ورور زحل عمري هم وواژه.
افغانستان د خبریالانو لپاره یو خونړی هېواد بلل کېږي او د ملګرو ملتونو د شمېرو پر اساس له ۲۰۱۸ څخه تر ۲۰۲۱ پورې لږ تر لږه ۳۳ خبریالان وژل شوي دي.