د پکتیا ولایت سوداګرۍ خونې مشر نصیر علم یار وايي، د خامو موادو نه موجودیت له امله ۱۵ فابریکې تړل شوي او د خوراکي او نورو توکو بیې هم ۱۵ سلنه لوړې شوي او لامل یې د پټان لارې بندیدل دي.
په ورته وخت کې علم یار وايي، مرکزي حکومت باید د پټان لارې پرانېستلو لپاره اقدامات وکړي.
علم یار زیاته کړه: «له ۱۰ تر ۱۵ فابریکو له دې امله تړل شوي دي، چې خام مواد نه لري. دغه خام مواد د پټان له لارې راوړل کېدل او اوس دغه لاره تړل شوې ده.»
د پکتیا اوسېدونکي هم بازارونو کې د خوراکي او نورو توکو د بېو له لوړوالي شکایت کوي.
د پکتیا یو تن اوسېدونکی وايي: «پکتیا کې د خوراکي او غیر خوراکي توکو بیې لوړې شوي، ان څو برابره لوړې شوي دي. زه فکر کوم، لامل یې د پټان لویې لارې تړل کېدل دي.»
د پکتیا ولایت یو بل اوسېدونکی بیا وايي: «موږ پخوا د اوړو یوه بوجۍ په ۱۷۰۰ افغانۍ اخېستله، خو اوس یې پر ۲۴۰۰ افغانۍ اخلو. همدارنګه د تېلو او ګازو بیې هم لوړې شوي دي.»
هټیوال هم مني چې د پټان لویې لارې تړل کېدو له امله د خوراکي او نورو توکو بیو کې لوړوالی راغلی دی.
د ګردېز ښار یو هټيوال وايي:«له کله نه چې د پټان لاره تړل شوې، د خوراکي توکو بیې لکه اوړو، غوړیو او نورو بیې لوړې شوي دي. ډېری خلک یې د اخېستلو توان نه لري.»
د سوداګرۍ خونې د مالوماتو له مخې ګردیز ښار کې د خوراکي او نورو توکې زیرمې په ختمیدو دي او که حکومت همکاري ونه کړي، پکتیا کې به د توکو بیې نورې هم لوړې شي.