د ولسمشر سلاکار وحید وعمر وايي:« هغه غږ،چې مینه پال پورته کړی و، دفتنې، یرغل او تیارې پر وړاندې و او دا غږ به هېڅ کله مړ نه شي. که یو مینه پال یې واخېست،خو په دې وطن کې زرګونه نور مینه پالان شته،چې دا غږ ژوندی وساتي.»
مینه پال،چې له دولتي دندې وړاندې یې کلونه له رسنیو سره د خبریال په توګه کار کړی و، د تدفین مراسمو کې یې پخوانیو همکارانو او د خبریالانو د خوندیتوب کمېټې مسوولینو وویل،په وژنو یې څوک نه شي چوپ کولای او خپلې مبارزې ته به دوام ورکوي.
د خبریالانو خوندیتوب کمیټې مشر نجیب شریفي وايي:« پر وژنو سره به زموږ اراده ضعیفه نه شي او دا مو هېواد دی. موږ خپل لار انتخاب کړې،چې پر مخ به ځو او هېڅ څوک زموږ پر وړاندې خنډ نه شي جوړېدای.»
د دوا خان مینه پال د کورنۍ غړي بیا وايي، له جمهوریت یې د دفاع په لاره کې له کوره پنځه جنازې وتلې دي او لاهم قربانۍ ته چمتو دي .
دوی له امنیتي ارګانونو غوښتنه وکړه، چې د مینهپال قاتلین پيدا او مجازات کړي.
د مینه پال د کورنۍ غړی وايي:« دا زموږ د کورنۍ لومړۍ غم دی،په دې لار کې زموږ له کوره پنځه جنازې وتلي دي،خو شاته به ونه ګرځو او ادامه به ورکړو،خو حکومت دې زموږ د مینه پال عاملین پیدا او قانوني سزا دې ورکړي.»
دوا خان مینه پال د تیرې جمعې پر ورځ د کابل ښار په دارالامان سیمه کې د څلورو وسله والو طالبانو بریدګرو له خوا هغه مهال په ډزو ووژل شو،چې له دولتي زرهې موټر نه خپل شخصي موټر ته پورته شو او د کور پر لوري روان و.
دواخان کلونه د ولسمشرۍ ماڼۍ مرستیال ویاند پاتې شوی و او وروستۍ دنده یې د حکومت رسنیو مرکز مشري وه. مینه پال واده کړی و او دوه زامن او درې لوڼې ترې پاتې شوې.