Skip to content
نن په لغمان ولایت کې د یاد ولایت سربېره د کونړ، نورستان او ننګرهار ګڼ دیني عالمان راټول شوي وو او په افغانستان کې روانه جګړه یې ناروا وبلله.
دوی همدا راز له دولت او طالبانو د سمدستي اوربند غوښتنه وکړه.
مولوي مشتاق همیم وایي، په افغانسان کې ٩٩.٩ خلک مسلمانان دي، پر وړاندې یې جګړه کول هېڅ دیني مشروعیت نه لري.
هغه زیاته کړه، هر څوک د افغانانو پر وړاندې جګړه کوي، باغیان او د پردیو د غوښتنو تابع دي.
د لغمان ولایت د علماو د شورا رییس فرمان الله نیازي بیا وویل، دا د ګاونډیو هېوادونو توطیه ده او موږ نه پرېږدي چې له روان وضعیت څخه را ووځو.
اخوا بیا د کونړ د علماوو د شورا رییس ضیاء الرحمن الله یار وویل، د افغانستان دولت او نظام بشپړه اسلامي دي او د افغانانو د وینې په بدل کې جوړ شوي.
هغه همدارنګه د جګړې په ښکېلو غاړو د اوربند غږ وکړو او زیاته یې کړه چې افغانان نور باید ارام ژوند ته پرېښودل شي.
ګڼو نورو علماوو هم جګړه وغندله او د سولې په خبرو یې ټینګار وکړو.
