مالیې وزارت: ملي عوایدو کې تر درې میلیارده افغانیو کمښت راغلی

د مالیې وزارت وايي، په شپږو مهمو سرحدي ګمرکونو کې د طالبانو د کنټرول له امله د دوی فعالیتونه درېدلي او په عوایدو کې یې نږدې درې میلیارده افغانۍ کموالی راغلی دی.

د یاد وزارت د مسوولین وايي، په جوزا میاشت کې ۷.۳ میلیارده افغانۍ عاید راټول شوي وو،خو په خبره یې په سرطان میاشت کې دغه کچه ۴.۶ میلیارده افغانیو ته راښکته شوې ده.

د مالوماتو له مخې، د کندز شیرخان، د تخار ای خانم،د هرات اسلام کلا او تورغونډۍ،د فراه ابو نصر فاراهي، د پکتیا ډنډ پټان او د کندهار سپین بولدک بندرونه د طالبانو په کنټرول کې دي.