دوی پر ایران او پاکستان نیوکې وکړې، چې د خپلو ګټو لپاره د جګړه مارو ډلو ملاتړ کوي.
غونډه کې په ایران تور پورې شو، چې غواړي افغانستان کې د اوبو بندونه تخریب کړي ترڅو د کمال خان او سلما بند اوبه، چې پر دې هېواد بندې شوي، بېرته ور وبهېږي.
عبدالصمد فرمولي د ملي ائتلاف ګوند مشر وايي: «د تروریستانو او طالبانو ملاتړ او تجهیز ایران هېواد کوي، ترڅو د خلکو د ذهنونو او عامو ګټو خلاف عمل ترسره کړي.»
معین څمکنی د حق او عدالت ګوند مشر وايي: «اوس زموږ حکومت په ناامن وضعیت کې دی، نو ایران او ګاونډي هوادونه دې له دې وضعیته ګټه نه پورته کوي او لاسوهنه دې نه کوي، ځکه اوس ټول افغانان دوی ته متوجه دي.»
غونډه کې پر اسلامي هېوادونو او نړیوالو سازمانونو هم نیوکې وشوې، چې د افغانستان د لسیزو جګړو پر وړاندې چپ دي.
د غونډې برخه والو پر حکومت غږ وکړ چې له مهار شویو اوبو دې ګټه واخلي او که ګاونډي یې غواړي، د پيسو په بدل کې دې ورکړي.
د غونډي ګډونوال عبدالرحیم نوري وايي:« د نړۍ پر کچه له سلو ډېر اسلامي هېوادونه دي، خو د افغانستان په ۴۰ کلنه جګړه کې هېڅ غبرګون نه ښیي او ان نړیوال او زموږ ګاونډې هېوادونه.»
پخوانی پوځي جنرال یوسف همت وايي: « هلمند اوبه د کمال خان بند، سلما اوبه او همداسې ډېرې اوبو دي،چې باید حکومت یې مخه ونیسي او د ګټې اخېستلو په صورت کې به د ماهیانو فارمونه ولرو. دومره برېښنا به ولرو، چې د ټولو ګاوندیو هېوادونو لپاره هم بسنه کړي.»
دغې ولسي غونډې د یوه پرېکړه لیک په صادرولو له ایران او پاکستان په کلکه غوښتنه وکړه، چې د خپلو شومو موخو لپاره دې د افغانستان په چارو کې لاسوهنې بندې کړي او د جګړې پرځای دې د افغانستان په سوله کې خپلې ګټې تعقیب کړي.
