افغان ولسمشر محمد اشرف غني نن په ارګ کې د څارنې او همغږۍ ګډ بورډ په ځانګړې ناسته کې د وینا پر مهال وویل، په افغانستان کې روانه جګړ کورنۍ نه بلکې د افغانانو او ترهګرو ترمنځ جګړه روانه ده او نړیوال باید د افغان حکومت تر څنګ ودرېږي.
ولسمشر غني زیاته کړه: «دا جګړه کورنۍ نه ده. هېله ده،دا درک کړئ، نن هم د ډول ترمنځ جګړه ده او دا تروریستي جګړه ده. که موږ د روانې جګړې دا بعد هېر کړو او دې جګړې ته د افغانانو جګړه ووایو، حقیقت به دا وي، چې موږ په اصل کې لوی تصویر نه وینو.»
د ملګرو ملتونو د عمومي منشي ځانګړې استازې دیبرا لاینز بیا طالبان د تاوتریخوالي د زیاتېدو او د ملکي تلفاتو اصلي لامل وبلل.
لاینز غوښتنه وکړه،چې اوسنی وضیعت د منلو نه دی او طالبان دې ژر تر ژره تاوتریخوالی کم او مذاکرات دې چټک کړي.
هغې زیاته کړه: «طالبان له هر لوري زیات د ملکي تلفاتو مسوول دي. روانه جګړه کې د ملکي تلفاتو نیمايي برخه ښځې او ما شومان دي او که چیرې تاوتریخوالی کم نه شي، د مرګ ژوبلې دا کچه به له دې هم لوړه شي.»
ولسمشر غني وايي، د ټولې نړۍ دیني عالمانو ټینګار کړی، چې د طالبانو جګړه دیني او مذهبي اړخ نه لري او طالبان تر سولې پر جګړو ډېر باور لري.
ولسمشر غني زیاتوي: «د پاکستان په ګډون د ټولنې نړۍ دیني عالمان پر دې هم نظره دي، چې روانه جګړه هېڅ دیني او شرعي اړخ نه لري.»
بل پلو د ملي روغې جوړې عالي شورا مشر ډاکټر عبدالله عبدالله وايي، د سولې راتګ لپاره د دوحې ناسته یو ښه فرصت دی او طالبان د جګړې له لارې نه شي کولی،ځان واک ته ورسوي.
عبدالله زیاته کړه: «د سولې خبرې ډېرې ورو روانې دي.کومې ژمنې چې د تاوتریخوالي د کمولو برخه کې شوې وې، نه دي عملي شوي او ستونزې لا زیاتې شوې.»
افغان چاروکو له نړیوالې ټولنې غوښتنه وکړه،چې په دې سختو شرایطو کې د افغانانو لاسنیوی وکړي او په بېلابیلو برخو کې خپلې مرستې ډېرې کړي.
