په وروستیو کې پر ډيورند فرضي کرښه پرتې هغه سیمې چې د طالبانو تر ولکې لاندې دي، وسله وال او پاکستانۍ ملیشې پرې د کرښې دواړو خواوو ته ازاد تګ راتګ کوي.
په خواله رسنیو کې خپرو شویو ویډیوګانو له خلکو سره اندېښنې پیدا کړي، چې پرانیستې لارې به افغانستان ته د وسله والو کسانو راتګ اسانه کړي.
د ولسي جرګې غړي وايي، که حکومت د سپین بولدک د بېرته نېولو لپاره اقدام ونه کړي، کندهار کې روانه جګړه به لا پېچلې او د وسله والو طالبانو د نور پرمختګ لامل به شي.
د ولسي جرګې غړی هلمند هلمند وايي: « اوس چې د سپین بولدک بندر د طالبان په لاس کې دی، د پاکستان حکومت او استخبارات په اسانه له دوی سره هر ډول همکاري د تجهیزاتو، بشري ځواک او د جګړې پلان او پالیسۍ په برخه کې کولای شي. حکومت باید هڅه وکړي، چې سپین بولدک ولسوالۍ بېرته ونیسي.»
اخوا د سیاسي چارو یو شمېر شنونکي بیا وايي، د دغو ویدیو ګانو د صحت په اړه لاهم شکونه شته، خو په خبره یې حکومت باید له څیړنو وروسته جدي اقدام وکړي.
د سیاسي چارو شنونکی اسدالله ندیم وايي:«د افغانستان دولت مکلف دی، چې د بهرنیو او کورنیو مسلکي بنسټونو پر مرسته د دغو نشریو ویدیو ګانو واقعیت تائید کړي او له هغې وروسته باید جدي اقدامات وکړي.»
بل پلو طالبان هم دا مني چې په لومړیو کې پر کرښه ځینې سرغړونې شوي دي، خو په دې اړه د څېړنو خبر ورکوي او زیاتوي چې له دې وروسته د دغه ډول ټولو خپلو سریو مخه نیسي.
یوه بله ویډیو چې د ایران شیراز ښار ته منسوبه ده افغان طالبان په کې په ازادانه توګه ګرځي راګرځي او له یوه بل سره روغبړ کوي.
په خواله رسنیو کې د دغو ویدیو ګانو خپرېدو د خلکو سخت غبرګونونه راپارولي دي.
