د کابل ښار کې د اختر پر دویمه ورځ هم ګڼ هغه واټونه له څارویو ډک ول او سړکونه یې چټل کړي، چې له امله یې خلک له ستونزو سره مخ کړي دي.
د څارویو پلورونکي هم مني،چې بي نظمي یې رامنځته کړې، د واټونو شااوخوا او سړکونه یې چټل کړي خو وايي، د هر پسه پر سر ترې ښاروالۍ پنځوس افغانۍ اخلي او د خرڅلاو اجازه یې ورکړې ده.
د څارویو یو تن پلورونکی:« له موږ ښاروالۍ د هر پسه پر سر ۵۰ افغانۍ اخلي. که پیسې ورکړو، د څارویو پلور ته مو پرېږدي او که پیسې ورنه کړو، نه مو پرېږدي.»
له دې وراخوا بیا هغوی چې د اختر پر لومړۍ ورځ یې قرباني کړې،کثافات او پاتې شونې یې واټونو ته اېستلي او خلک یې له ستونزو سره مخ کړي دي.
د کابل ښاروالۍ کارکونکي د اختر له لومړي ورځې پرې بوخت دي، خو وايي ښاریان بې غوره دي او دا چاره د دوی له توان وتلې.
د کابل ښاروالۍ یو تن کارکونکی په دې اړه بیا داسې وايي:« له خپلو خلکو مو غوښتنه دا ده،چې کثافات په هغه ځای کې واچوي، کوم ځای چې د ښارولۍ له لوري ځانګړی شوی دی. دا د کثافاتو اچولو ځای نه دی. زموږ خلک ۱۰۰ زره یا ۱۵۰ زره غوا اخلي، خو کولمې او لری یې پر عمومي سړکونو اچوي.»
اخوا یو شمېر روغتیا پالان بیا وايي، د کورونا وبا درېیمې څپې سره د کثافاتو بوی خطرناکې ناروغۍ رامنځته کولای شي او په خبره یې عامه پوهاوي ته اړتیا ده.
په ورته وخت کې دوی وايي، دې حالت اندېښمن کړي او په خبره یې بدې پایلې به له ځانه سره ولري.
کابل کې ککړه هوا او ناسم چاپيریال تر جګړې ډير انسانان وژني، وروستي ارقام ښیې،چې هر کال یوازې په کابل کې د ککړې هوا او ناسم چاپيریال له امله تر ۳۰۰ زره کسان پر بېلا بېلو تنفسي ناروغیو اخته کېږي.
