یو شمېر معتبرو امریکايي رسنیو د دغه هېواد له ولسمشر جو بایډن نه په یو لیک کې غوښتي،چې هغه افغان خبریالان دې امریکا ته ولیږدوي،چې تېرو کالونو کې یې له دوی سره په افغانستان کې کار کړی.
په لیک کې د امریکا یو شمېر مشهورو رسنیو د افغانستان نه د امریکایي عسکرو تر وتلو وروسته د خپلو افغان همکارانو د ژوند د خوندیتوب په هکله اندېښنه څرګنده کړې.
په لیک کې ویل شوي،دا چې دغو کسانو له امریکایي رسنیو سره کار کړی، ښایي طالبان به پرې د غچ اخېستو په خاطر بریدونه وکړي.
دغو امریکایي رسنیو ویلي، شااوخوا ۱۰۰۰ ویزو ته اړتیا لري،چې له مخې به یې د هغوی افغان همکاران امریکا ته ولیږدول شي.
د امریکا ولسمشرۍ ماڼۍ تر اوسه پورې د دې لیک په هکله غبرګون نه دی څرګند کړی.
د خبریالانو د ملاتړ ادارو د معلوماتو پر بنسټ افغانستان په نړۍ کې د خبریالانو لپاره یو تر ټولو ګواښوونکی هېواد دی.
