افغان ولسمشر محمد اشرف غني د اختر پر دویمه ورځ د کومانډو ځانګړو ځواکونو عملياتو له قول اردو لېدنه کړه او هلته یې مېشتو کومانډو ځواکونو ته د وینا پر مهال وویل، د عادلانه او پایداره سولې اراده لري، خو په خبره یې هېچکله به چاته تسلیم نه شي.
په ورته وخت کې ولسمشر غني وايي د وسله والو طالبانو جګړه هېڅ دیني او ملي مشروعیت نه لري.
ولسمشر غني کومانډو ځواکونه وستایل او د دوی مبارزه یې د افغانستان، ازادۍ او د تېرو شلو کلونو د لاسته راوړنو د خوندي کولو وبلله.
هغه کمانډو ځواکونو ته د هر ډول ملاتړ ډاډ ورکړ او دوی یې د هېواد زړور سرتیري وبلل.
ولسمشر غني زیاته کړه:« زما زړه مطمین دی، ځکه پر ځانګړو قطعاتو، کومانډو ګانو او پر زړورو ځواکونو باندې مې باور لرم. تاسې دا وطن ساتئ. زه پر تاسو ویاړم.»
هغه زیاته کړه،چې، طالبان له القاعده، جيش محمد او لشکر طيبه وسله والو ډلو سره ژورې اړيکې لري او غواړي افغانستان د تروريستانو پر پټنځای بدل کړي.
ولسمش غني وايي:« دوی د پاکستان له مدرسو امر اخلي. دوی غواړي، ۱۰ زره د لشکر طیبه او جیش محمد ډلې غړي راورد کړي، چې له دې لارې غواړي، بیا ټول افغانان تباه کړي. یو ځل مو ونه لېدل؟ اسامه بن لادن له افغانستانه سره څه درلود، د اسامه لپاره یې څه خرابي رانه وړه. فکر وکړئ! نن اسامه ضرب دې ۲۰ زره کړئ. دوی غواړي،چې افغانستان د تروریستانو زانګو شي. زموږ اراده دا ده،چې له منځه یې یوسو. نه یې پرېږدو، نه یې پرېږدو.»
ولسمشر وايي، د افغانستان دولت، ملت او ځانګړي قطعات به هیڅکله وسله والو ته اجازه ورنه کړي،چې کور یې د ترهګرو په ځاله بدل شي.
له دې سره ولسمشرغني وايي، د طالبانو جګړه دیني او ملي مشروعیت نه لري او له درېیو تر شپږو میاشتو ټول تمرکز یې د اوسني وضعیت په مدیریت دی او د ځانګړو پلانونو او برنامو پر اساس به لا زیات مثبت بدلون ومومي.
