عراقي چارواکي وايي، د پلازمېنې بغداد په ختیځ صدر ښار کې له ګڼې ګوڼې ډک یوه مارکیټ کې چاودنه شوې.
دوی وايي، په دې پېښه کې ۳۵ کسان وژل شوي او له ۵۰ ډېر ټپیان دي.
د چارواکو په خبره، په وژل شویو کسانو کې ۸ مېرمنې او ۷ ماشومان شامل دي.
دې مارکیټ کې ګڼ خلک د اختر په سودا اخېستو پسې راوتلي وو.
د اسلامي دولت نومې ډلې یا داعش د یاد برېد مسوولیت پرغاړه اخېستی دی.
دا په تېرو شپږو میاشتو کې پلازمېنه بغداد کې تر ټولو خونړۍ چاودنه بلل شوې ده.