افغانستان کې د امریکا سفارت په ګډون د ۱۷ هېوادونو سیاسي استازوالیو په ګډې خبرپاڼه کې ویلي، د طالبانو روان بریدونه د سولې خبرو او د سیاسي حل له ادعا سره په ټکر کې دي.
د امریکا په ګډون کابل کې د ۱۷ هېوادونو سیاسي استازولیو د یوې ګډې اعلامیې په خپره ولو طالبانو ته دا ښودلې چې ګنې دوی د افغانستان د سولې او ثبات په تړاو واحد دریځ لري
خبرپاڼه کې پر طالبانو غږ شوی دی،چې روان بریدونه د خبرو له لارې سیاسي حل لارې ته د رسیدو هڅې شنډ وي، ملکي وګړي ترې زیان ویني، هغوی بې ځایه کوي،نو باید زر تر زره تاوتریخوالی بند شي.
د خبرپاڼه یوه برخه:« د افغانستان په اسلامي جمهوریت کې د استرالیا، کاناډا، ډنمارک، چک جمهوریت،د اروپايي ټولنې استازي،فنلډ، فرانسې، جرمني،ایټالیا، جاپان، کوریا، هالنډ، د ناټو ملکي استازوالۍ،اسپانیا، سویډن،بریتانیا او متحده ایالاتو ډيپلوماتیکي نمایندګۍ، د طالبانو د روانو بریدونو چې د خبرو له لارې یو سیاسي حل لارې ته د رسېدو هڅې شنډوي، ملکي خلک زیانمنوي او بېځایه کوي،د چټک بندېدو غوښتونکي دي.»
یادو بهرنیو هېوادونو په افغانستان کې هدفي بریدونه، د زېربناو ویجاړول او د افغانانو د تیرو دوو لسیزو لاسته راوړنو پر وړاندې ګواښونه غندلي دي.
په دغه ګډه خبرپاڼه کې راغلي،چې طالبان باید په لوی اختر کې وسلې پر ځمکه کېږدي او د سولې په اړه نړیوالو ته خپله ژمنتیا وښيي.
د ګډې خبرپاڼې یوه برخه:« موږ په افغانستان کې د ملګرو ملتونو له مرستندویه ماموریت سره یو ځای له طالبانو او نورو اړخونو څخه غواړو،چې ډېر ژر روان تاوتریخوالي ته د پای ټکی کېږدي.له یو دایمي او هر اړخېزه اوربند سره هوکړه وکړي.»
په داسې حال کې چې طالبانو په افغانستان کې په دې وروستیو کې خپلو بریدونو ته زور ورکړی او یو شمېر سیمې یې نیولې دي، د دغې ډلې مشر ملا هبت الله اخند ټېنګار کړی، چې هغوی د شخړې د سیاسي حل پلوي دي.
اخوا د ملي روغې جوړې عالي شورا بیا د دغې ګدې خبرپاڼې هرکلی کړی او پر طالبانو یې د نیوکې په ډول ویلي، دا فکر چې روانه ستونزه د تاوتریخوالي په زیاتولو، وژنو پای ته رسیدای شي، یوه نه جبرانېدونکې تېروتنه ده.
د ملي روغې جوړې عالي شورا د خبرپاڼې یوه برخه:« د افغانستان دوست او متحدو هېوادونو له روښانه دریځ هرکلی کوو، افغان دولت په پرلپسې ډول د جګړې د پای، اوربند او یو عادلانه او تل پاتې سیاسي حل لپاره هڅې کړي. دا فکر چې روانه ستونزه د تاوتریخوالي په زیاتولو، وژنې او وینې بهولو سره کولی شو، پای ته ورسو،هغه نه جبرانېدونکی اټکل دی. تاوتریخوالی تاوتریخوالی زیږوي، د افغانستان خلک هېڅ ډول زور زیاتي ته نه تسلیم کېږي، نو غوره دا ده،چې طالبان روان وضعیت ته په کتو ګټورو خبرو اترو ته کیني او له دې زیات د افغانستان خلکو د کړاو سبب نه شي.»
دا په داسې حال کې ده،چې پرون شپه په دوحه کې د افغان سولې په اړه دوه ورځنۍ بین الافغاني غونډه پای ته ورسېده.
دواړو غاړو په ګډه خبرپاڼه کې د سولې خبرو پر ګړندي کولو ټېنګار کړی او په ټول افغانستان کې د ملکي زيربناو خوندي ساتلو، د ملکي تلفاتو مخنيوي او د بشري مرستو په اړه له يوه بل سره د همکارۍ ژمنه کړې ده.