د عامې روغتیا وزارت وايي، په پلازمینه کابل او ولایتونو کې لاهم د کورونا وبا د ګواښ کچه لوړه ده.
بل پلو په یو شمېر ولایتونو کې د کورونا وبا ناروغان لاهم د آکسیجن له کمښت سره مخ دي او وايي، روغتونونو ته د آکسیجن سیستم انتقال شوي، خو په خبره یې د ځای پر ځای کېدو چارې یې نه دي پیل شوي.
د پکتیا ولایت یو تن اوسېدونکی وايي:« د اکسیجن پلانټ لپاره هغه څه موارد چې اړین ول، ټول رارسېدلي دي. د دې جوړښت او فعالیت تنظیم کولو لپاره باید جدي ګام پورته شي. د اکسیجن د کمښت ستونزه شته. د دې ستونزې د حل لپاره باید اکسیجن پلانټ ژر تر ژره فعال شي.»
عامې روغتیا وزارت هم په ولایتونو کې د آکسیجن د کمښت ستونزه تائیدوي او د حل ډاډ ورکوي.
د یاد وزارت ویاند میروس علیزی وايي، په لسو ولایتونو کې یې د آکسیجن تولید سستم نصب کړي او هڅه کوي،دا لړۍ چټکه او ستونزې حل کړي.
د روغتیا وزارت مرستیال ویاند میروس علیزی وايي:« د اکسیجن کمښت ګواښ موجود دی. د عامې روغتیا وزارت په پوره توګه هڅې کړې، ترڅو دغه ګواښ لرې کړي.»
د نورو ورځو پرتله د جمعې ورځې په شمېرو کې د کورونا وبا له امله د مړینې کچه ټیټه ښودل شوې.
روغتیا وزارت وايي، په تېرو ۲۴ ساعتونو کې د کورونا وبا له امله ۴۹ کسان مړه شوي دي.
د کابل ښار یو تن اوسېدونکی وايي:« ډېری کسان ماسک نه کاروي. تاسو په دې بازار کې وګورئ. ښايي پنځه کسانو هم ماسک نه وي تړلی.»
د عامې روغتیا وزارت د رسمي شمېرو له مخې، په تېره یوه شپه او ورځ کې ۱۱۳۲ کسان پر کورونا وبا اخته شوي، چې له دې سره هېواد کې پر کورونا وبا د اخته کسانو شمېر ۱۴۰ زره ۲۲۴ ته لوړ شو.
