په یوولسو ولایتونو کې دافغان پوځ او وسلهوالو طالبانو ترمنځ سختې جګړې روانې دي، خو ددغو جګړو پرمهال ځینې سیمې طالبانو ته پرېښودل کیږي، هغه څه چې امنیتي او پوځي مسوولین یې تکتیکي شاتګ ګڼي.
خو نیوکې دا دي چې دغه تکتیکي شاتګ ځواکونو او حکومت ته په لوړ قیمت تمامیږي او سرتیري یې بیا د سر په بیه بیرته نیسي.
د ولسي جرګې غړی بسم الله جان محمدي وایي: ((شاتګ په دې مانا دی چې د دوی تشکیل نه دی پوره . د دوی پنځه سوه تشکیل ده، خو دوی شل کسه کینولي او معاش راخلي خپلو جیبونو کې یې اچوي، هغه وخت دوی ولسوالۍ ته کمک ورکوي، چې هغه [نظامیان] یا مړه کړي یا سقوط کړي، وروسته بیا دوی الوتکي وراستوي…))
امنیتي ځواکونه بیا په جګړه کې شاتګ او مخکې والی طبیعي ګڼي او وايي ځواکونه یې له هېواده په دفاع کې جدي او مستقلانه چلند کوي.
په همدې حال کې، ملي دفاع وزارت په لغمان او لسو نورو ولایتونو کې طالبانو ته د درنې مرګ ژوبلې اړولو ادعا کوي.
دفاع وزارت وايي، شاوخوا یو نیم سل طالبان یې وژلي لس ګونه نور یې ټپیان کړي او سیمې یې هم ترې پاکې کړي دي.
سره د دې چې طالبان د دفاع وزارت دغه ادعا ناسمه بولي، وايي، په تېرو څلورویشت ساعتونو کې یې د امنیتي ځواکونو لسګونه پوستې نیولي اومرګ ژوبله یې هم ور اړولې.
پخواني نظامیان بیا د طالبانو په لاس د سقوط شویو سیمو بیرته نیول، د طالبانو د بریدونو پر وړاندې جدي اقدامات او هغوي ته مرګ ژوبله اړول له پوځي نظره بریا نه ګڼي.
دوي وايي، پکار ده چې په اوسنیو شرایطو کې افغان پوځ تعرضي حالت غوره کړي.
لغمان، ننګرهار، کندهار، هلمند، غزني، میدان وردګ، بغلان او پنځه نور هغه ولایتونه دي چې د افغان پوځ او طالبانو ترمنځ پکې شدیدې جګړې روانې دي او دواړه لوري یو بل ته د مرګ ژوبلې اړولو ادعاوې لري.
