د جرمني د بهرنیو چارو وزیر هایکو ماس د بین الافغاني خبرو ملاتړ کړی او ویلي یې دي، چې ناټو ځواکونه باید په مشروط ډول له افغانستان ووځي.
هایکو ماس، له محمد حنیف اتمر سره په ټلیفوني خبرو کې ویلي، برلین د افغانانو په مالکیت او مشرۍ د سولې له خبرو ملاتړ کوي او په افغانستان کې اوسنی بد امنیتي وضعیت، هدفي وژنې او تاوتریخوالی ورته د منلو نه دي.
دواړو لوریو ټینګار کړی، چې له افغانستان څخه د ناټو ځواکونو وتل باید مسؤولانه وي.
د جرمني د بهرنیو چارو وزارت ډاډ ورکړی، چې د ناټو سازمان له غړو هېوادونو سره به کار وکړي، چې په مشروط ډول د بهرنیو ځواکونو وتلو ته زمینه برابره کړي.
هایکو ماس له دې وړاندې هم ویلي وو، چې په افغانستان کې د بهرنیو ځواکونو شمېر باید په مشروطه بڼه کم شي او د تیرو دوه لسیزو د لاسته راوړنو د خوندیتوب لپاره باید هېڅکله عاجلې او تیزې پریکړې ونه شي.
