کندهار کې د ملي زراعتي پوهنتون اداري کارکوونکي او ښوونکي چې د بې عدالتيو او نه برابرۍ شعارونه له ځانه سره ليږدوي، له تېرو لسو ورځو را په دېخوا يې د کندهار د ملي زراعتي او ټکنالوژۍ پوهنتون په انګړ کې د کار نه کولو اعتصاب کړى.
دوی له مسوولینو غواړي چې د ولسمشر هغه طرحه په ټولو دولتي ادارو کې په یوشان پلې شي چې د ملکې مامورينو د معاشونو د لوړوالي په برخه کې يې جوړه کړې ده.
دوى وايي، دا مهال د ټيټ معاش له امله په ځينو دولتي ادارو کې فساد موجود دى، خو که يې امتيازات لوړ شي ياده ستونزه به حل شي.
دوى وايي که يې غوښتنې ونه منل شي، خپل کاري اعتصاب ته به دوام ورکړي او لاريونونه به وکړي.
په ورته وخت کې د زراعتي پوهنتون مرستيال پوهنمل احمد فواد احساس وايي، ياده ستونزه يې له ولايتي ادارې او لوړو زده کړو له وزارت سره شريکه کړې، خو تر اوسه يې کوم مثبت ځواب نه دى تر لاسه کړى.
د کندهار د والي وياند بهير احمدي وايي، ددې ملي زراعتي پوهنتون دغه ستونزې د کندهار ولایت مقام له لورې له مرکزي ادارې سره شريکې شوې دي.
دكرنې او تكنالوژۍ ملي پوهنتون شپږ کاله وړاندې په څلويښت جريبه ځمكه كې دهندوستان له خوا په سل ميليون ډالرو مرسته جوړشوى، چې په سيمه كې د خپل ډول لومړى پوهنتون بلل كيږي.
