د ولسمشر ویاند صدیق صدیقي نن په کابل کې یوې خبري ناستې ته وویل، افغان حکومت بین الافغاني خبرو ته چمتو دي او د سولې بهیر اړوند ټولې ننګونې او احتمالي خطرونه اداره کوي.
د ولسمشر ویاند صدیق صدیقي وایي، طالبان لا هم بین الافغاني مذاکراتو ته چمتو نه دي او دوی باید هر هغه څه چې د سولې خبرو د پیل لپاره اړین دي، ژر تر ژره ترسره کړي.
ښاغلی صدیقي وایي چې د بین الافغاني خبرو پر وړاندې تخنیکي ستونزې شتون لري چې د همدې له امله د افغان حکومت د مذاکره کوونکي پلاوي سفر قطر ته ځنډېدلی دی.
که څه هم ښاغلي صدیقي د دغو تخنیکي ستونزو په تړاو بشپړ مالومات ورنکړل، خو شنونکو په باور، د یو شمېر بهرنیو ځواکونو د وژنو شپږ مالوم طالب بندیانو برخلیک مالومېدل، د طالبانو او دولتي چارواکو خپل منځي مشورتي ناستې او د اجنډا پر سر روان بحثونه د خبرو د پيل موقتي ځنډ بلل کېږي.
د ولسمشر ویاند همداشان د اروپایي ټولنې او کاناډا هېواد له هغې اعلامیې هم هرکلی وکړ چې له طالبانو یې په کې د اوربند غوښتنه کړې وه.
دا په داسې حال کې ده چې طالبانو د سولې خبرو لپاره خپل ۲۱ کسیز مذاکراتی ټیم اعلان کړی چې مشري یې مولوي عبدالحکیم کوي.
د امریکا بهرنیو چارو وزارت هم ویلي چې د افغان سولې لپاره د دې هېواد ځانګړي استازي زلمي خلیل قطر ته سفر کړی دی.
