د جوړېدونکې لویې مشورتي جرګې کمیسېون په لومړنۍ خبري ناسته کې د جرګې د جوړښت په څرنګوالي او د څلور سوه طالب بندیانو په تړاو وضاحت وړاندې کړ.
د لویې مشورتي جرګې د کمیسېون رییس معصوم ستانکزي په دغه خبري ناسته کې وویل، د طالبانو له لورې د غوښتل شوي لېست څلور سوه بندیان په پنځه کټګوریو وېشل شوي، چې اعدام، اختطاف، قتل، اخلاقي او مالي فساد باندې محکوم دي او له همدې امله یې خلاصون د ولسمشر له صلاحیت څخه پورته او د جرګې د رابللو موخه همدا لامل دي.
له دې وړاندې، د پاتې طالب بندیانو د خلاصون په تړاو د حکومت له ادرسه څو غږونه موجود وو، چې د بهرنيو وګړو موجودیت هم په کې زیږه خبره وه.
معصوم ستانکزی د نن ورځې په خبري ناسته کې بیا وویل: ((په دې څلور سوه بندیانو کې یو بهرنی هم نشته او ټول افغانان دي.))
د جرګې مشري تېر ځل استاد سیاف کوله خو اوس هغه ته ځینې نژدې کسان وايي، د جرګې مشري به دا ځل استاد سیاف ونکړي.
د جرګې پيل به د جمعې په ورځ وي او ممکن دوه ورځې دوام وکړي خو د جرګې غړي به یوازې د بندیانو د خلاصون لپاره ولسمشر ته مشوره ورکړي.
د جرګې لپاره ټول تدابیر نیول شوي او له ولایتونو د مېلمنو راتګ پيل شوی چې د مالوماتو له مخې د سبا ورځې تر پای به بشپړ شي.
